الجندي يخاف على عائلته و يريد يعيش و يستلم راتبه و عبد مأمور يطبق التعليمات و الشرطي نفس الحالة و حتى حماية الشخصيات يمشون وره حچي الي مسؤولين عن حمايته و البلوة كلها بالقيادات الفاسدة و التنظيم و التخطيط المخربط و كل مصيبة تصير توگع براس المسكين الي ذنبه سمع تعليمات القيادة و نفذها بدون نقاش و حماية الدكتور تحسين الفلاني (تحسين ابو الليل) انهچو لأن دخلو سيارة غريبة جاية على بيت قريب من بيت تحسين.
حمايته واگفين بسيطرة براس شارع بيت تحسين و يفتشون السيارات الداخلة و ياخذون السنوية من الصبح لحد الليل و براس الشارع اكو محلات و اسواق و ناس تجي و تروح و سيارات هواي تفوت و توگف و الظروف خطرة ما يخلون اي سيارة توگف يم بيت تحسين و من انهچو گامو ما يخلون السيارات الغريبة تدخل و الي يريد شي يعوف سيارته يم السيطرة و يدخل للشارع مشي.
سيارة سنتاڤيا حديثة وگفت و صاحبها دخل للشارع و ما طلع بعد و بالليل دخلو للشارع بيت بيت يسألون عن صاحبها و ما لگوه و دزو على مكافحة المتفجرات و الداخلية فحصوها بالجهاز و وراها بالچلب الكي ناين و ماكو شي و حماية تحسين گالو لتحسين يودوها للحجز بس تحسين طمع بالسيارة و راد يخمطها و سألو على صاحبها الاصلي و ما عرفوه و اخذها و حطها بالبيت لحد ما يعرف شلون يتصرف بيها.
حماية تحسين اكيد عدهم اصدقاء و معارف و واحد من الحماية صديقه گايله ياخذ غراض من السيارة و يفصخها و ينطيه فلوسها و الحماية گال لتحسين و تحسين انطاه الاوكي و الفلوس اله و ينطي للحماية ربعها و الولد جاب صديقه و دخلو للبيت و راحو للسيارة و راحو للمسجل و فتحوه چان يشوفون التفخيخ! و شلييع ركضو برة و طگت السيارة و طيحت حظ البيت بس الحمد لله تحسين مو بالبيت بعده بالطريق گاعد بالكشن الي وره و السايق لازم الستيرن و تحسين يغني بينه و بين نفسه (على الموت اخذنا)