تسواهن والسياسي

تسواهن اشهر من نار على علم يعني تعرف الطالع وتقرا
الفنجان وببساطة شديدة وبالجلفي حجيها بالمكان كلمتها ما تصير اثنين ابد..الجن وعشائرهم كلهم خطار يومية يمها…
ابو محمد يحب لعبة السياسة ويتمنى يصير بفد مركز مهم يعني حماية ومنصب وناس تصيح عاش عاش ف ما حالفه الحظ بكل الانتخابات وكلما يدخل يصرف فليساته ويجري خالي الوفاض وينتظر اربع سنوات حتى يشوف حزب او تيار ويرشح عن طريقه ونفس الحال..
ابو محمد كالوله داد ترى شغلتك داجة روح لتسواهن يمكن مسحورلك.. وفعلا راح وعرض مشكلته عليها وكالته عوفلي نفسك وانت ما عليك هل المرة تنجح يعني تنجح..
المهم تسواهن سوت سحر اسود هندي وخلته باجهزة العد والفرز الالكترونية وخلت ابو محمد محبوب الشعب وخلت حتى “هوبي” الي ميت صاره 7 سنوات ينتخبه يعني من الاخير ابو محمد صار ممثل الشعب في مجلس الولاية بس احلام ابو محمد ما انتهت وراد المزيد..
تسواهن تعرف خفايا السياسة بالولاية ومن اجل ذلك لعبتها صح خلت ابو محمد يخطب بنت ابو جوقي زعيم الشقاوات يعني خط احمر يعني فوق القانون حتى تمشي مسالة ابو محمد ويصير عنده ظهر ينسند عليه بس ابو محمد هم ما كعد راحة وارد يصير وزير ومثل متعرفون هاي الشغلة قوية ويرادلها فلوس هواية طبعا تسواهن هم لعبتها صح وخلت ابو محمد يدفع فلوس كومة لسلطان الولاية حتى يتعين بمنصب الوزير وكالته احسب ما اعطيته من اموال هو سر قفلية لمحل لان انت لازم ترجع فلوسك منه..
ام تسواهن عرفت معنى السياسة شلون تندار وكيف يحافظ المسؤول على امتيازاته عندما سن قانون بان الوزير لازم يكون فيه الشروط التالية ان يكون قادم من جهة ام تسواهن وصهر ابو جوقي واسمه ابو محمد حصرا…