فد يوم من أيام الثمانينات… من ظهريات طبّاخات التمر في مدينتي الكوت إنحشرنه كلنة بالهول وردنا نشعل المبردة جطل لأن الواتر بم خربان ويم كاظم العصبي، وهذا شيحاچيه عيني..؟؟!! حاچي صدام ولتحاچي كاظم العصبي أبو الكويلات…!! يعني الواتر بم راح إيطول هوايــــة…!! كنا مشكلين الصوندة مباشر على موزع الماي عالطلاگات التلاثـــة…المهم كل شي كان هادىء كل جيرانا نايمين والشوارع أتـصـــــوصـي…..!!
تك..!! شغلت المبردة وإتگول إنضربنة قنبلة ذريــــة…صوت عالي جدا وحشرجـــة خشنة غير طبيعية تخرج من المبردة. الكل شردت : شي جوة الكرويتات… شي جوة الدرج… شي بالمطبخ.. شي طلعت للسطح وأخذنا وضع الاستعداد…!! گــلـنة أجــوْ لـو طـبّـوْا..!! منو…؟؟!! منعرف؟؟ وقتها داعش لم تكن قد ولدت بعد..!! حينها كانت نطفة متعفنة في أصلاب نتنة لاتخرج من بين الصلب والترائب بل تخرج من الحيض والزنى..!! هاي أحنة من گبل عایشین تحت هاجــس الإجـوْ والطبّـوْا…!!!
المهم شي سحب مكانيس وشي تواثي وشي قنادر لاستيك ونعل وشي ثليثيات من هاي الشابعة مي وشي قبغات مال جـــــدورة ..!!أ وأمي ألله يرحمـــــهة راسأ نزعــت چـــرچــف المخدة البيضة وعلگته بالشحاطة القريبة منهـة ورفعته كإشارة إستسلام وخذنة كلنة وضع الأستعداد وإنتشرنا بعدين حول المبردة بالحديقة ويم الباب الرئيسي والمبردة بعدهــــة تهتز هزة قوية عنيفة جدا واصوات غريبة تطلع من داخلهة : طاق طيق طرببببباق طقططقطقطقطق طييييط طووووط طرررررررق خرررررررط خخخخخخخخطططط …!!!
ولــكم ميــو ياأولاد الكلب…الرحــمـة ياگواويــــــــد…ياسيبنديــــــة…!! عندها عرفنا بأن عتوي قد أنحشر بداخل سربس المبردة الجطل…!!! تصوروا عتوي ينضرب تلثمية سچيــنة بنفس اللحظة وبشكل مستمر..!! السربس ماقصر وياه..!! والعتوي الگواد چان سمين مربرب فأنغسل غسل..!! بيني وبينكم أنقهرنة عليه هوايــة المسكين ..! رأسا آني ركضت وطفيت المبردة وفتحنا بيبانها ورجعنة خمسطعش خطوة ليورة خشية ردة فعله الملعون..المهم نزل مجلّغ وشعره منتوف نتف، نص اذانه طايرة والنص الثاني بالكاد مچلب وعيونه حمر..! رمقني بنظرة قاسية خفت بعدها..! بعد نزوله من المبردة أخذ خطوتين نحوأقصى اليمين وراد يوگع ثم مالبث أن أستعدل وهالنوبـــة أخذ اربع خطوات حادة نحو أقصى الشمال عبالك سكران شارب بطلين عرگ فل..!! حتى الميو مالتـــة مطهـــة مط : مـــــــــيو… مــــــــيو…مــــــــيــــو… ياگووووووواوووووويـــــــــــــد سلختوا جلدي ياأولاد الزنى…نومـــــة الگشــــــرة علية وظهرية الســــــودة عليكم وعلى جيرانكم وكل المنطقة….!!أحنة من شفناه يحچی مثل المسجل العالس كاسيت مال كاولية فتحناله طريق آمن شلون هسة التحالف الدولي إيريد يفتح طريق آمن لداعش بخبث..!! وهو يمشي ويطوطح ويدردم علينة :
فگر وتبقون فگر ياأولاد الكلب …!!
إشترولكم مبردة مابيهة سربس..؟؟؟؟؟!!
أشترولكم سبلت… لا الچذب موزين وكتهة ماچان أكو سبلت… يقصد مكيـــف..!!
إشترولكم مكيف نازك لابي سربس ولابي صوت..!!
آآآآآآآآآآآآآآآخ بس أذكر السربس الملعون ظهري يوجعني حيل…جلغني حـــيــل هذا السربس اللئيم إبن الكلب…!!
يعني حرام واحد يناملة فد ربع ساعـــة آمنة باردة إبيتكم يابيت الفگر…؟؟؟!!
حـــــرام فد ربع ســـــاعــــة آمــــنة بهالبلد الأگــــــشـــــر..!!
من إنهجم بيتكم وبيت الخلفـــــوكم على هالعلــــــسة…!!
قفز نحو جدار البيت بعد أن عبر الحديقة وهو يطوطــــح ليهرب الى الشارع الفارغ تماما من أي مار، لكنه لمرتين لم يتمكن من الوصول الى فوق الجدار ثم مالبث أن إلتقط أنفاسه وسيطر قليلا و قفز قفزة ناجحــــة فوق جدار الحديقة ثم الى الشارع وتلاشى تحت حر طبّاخات التمر وأظنه إنصهر في منتصف الطريق من” علسة السربس”و شدة الحر في بيئة عراقية قائـــــضة في كل شيء…!!
