– باجي…
– ها سعاد، شعندج اليوم، وشنو هاي الورقه اللي بايدج؟
– هذا قرار من ” مجلس قيادة المرأة ” وأريد أقراه عليج..
– وشعندي آني، هيْ عوبه.. برلمان خو مو برلمان؟
– باجي : إنتي مو مديره؟
– إي مديره، وغصبن ما عليج..
– لازم تطبقين هاي التعليمات على نفسج وعلى موظفاتج؟
– وشنو هي التعليمات سوسو خاتون؟
– أولا: يمنع ارتداء البديات والتنورات القصيرة.
– لج هو البدي موديل، وحتى باجيتج تلبسه، والتنورات القصيره شلون نقيسها، أي تنوره مو طويله تعتبر قصيره، غير يكتبولنه الطول شجم سانتيم !
– ثانيا:يمنع ارتداء البنطلونات الضيقة، والستريجات، والفساتين الواضحة المعالم.
– هو البنطلون من خلقه الله ضيق، أما الستريجات والفساتين الواضحة المعالم فشعندي عرس خو ما عرس.
– ثالثا : يمنع ارتداء الأحذية الخفيفه ( الشحاطات).
– لج مخ البشه، شحاطات بالدوام الرسمي ؟ شعندي حمام النعيم ؟ لج آني لتكان أبو حقي ما أطلع بشحاطه، الدور بالدوام الرسمي، والله اللي تجي بشحاطه : أحش ريولها مثل ما تكَلول خالتي كَماشه.
– رابعا: يمنع ارتداء القمصان المبهرجه الألوان واللماعه.
– خو من البداية يكَلون لبسوا أسود وتحجبوا ويفضوها، هذا يا دماغ بشه مصدر هيج تعليمات؟
– باجي هاي ” اللجنه الوطنيه للنهوض بالمراة العراقية ” !
– ” تيييي ” على كَولة جده لمحمد غازي الأخرس. لج هي هاي هم محتاجه لتعليمات مال دوله؟ هي المديره أو المدير ينبهون موظفاتهم باللأناقه والحشمه بما يناسب الدوام الرسمي، وبما لا يضغط على الحريات الشخصية، يعني موتجيني موظفه بملابس البيت، لو بملابس حفلات، حتى المراجع من يجي يحس هو بدائره رسميه، مو بمطبخ مال مطلكَه، لو بحفله مال ستربتيز.
– ستربتيز شنو باجي؟
– إنجبي.
في أمان الله
[email protected]