اني كلش افرح من يتهور ابو اسراء ويتصرف بطريقة هستيرية ، افرح من يأمر وزارة سيادية مثل الداخلية لتقتحم وزارة سيادية مثل المالية ، وتقوم بتدمير مكتب الوزير واعتقال حمايته ،، افرح من يصدر اوامر القاء قبض ضد الهاشمي ويفتحله باب المطار حتى يفلت ، وافرح من يمنع صالح المطلك اربع مرات من دخول مكتبه كنائب رئيس وزراء وبعدين يسمحله ، وافرح من يصدر اوامر القاء قبض على سنان الشبيبي ومظهر محمد صالح حتى تضيع السياسة النقدية ، وافرح اذا اعتقل رافع العيساوي حتى تضيع السياسة المالية ،، وافرح اذا منع مسعود البرزاني من السفر ،، افرح كلش اذا اعلن حل البرلمان واعلن نفسه حاكم مطلق على البلاد والعباد ، لان دكتاتورية غبية افضل مليون مرة اخواني واخواتي ، من ديمقراطية ساقطة اخلاقيا ، دكتاتورية صريحة وعلنية افضل من ديمقراطية عاهرة و تخجل من الجيران ،، دكتاتور معتوه ومريض نفسيا ، افضل من برلمان سافل وسرداب للصوص ، عيني ابو اسراء بطريقك النجيفي ترى هذا هم شايف روحه ،، واذا تكدر اعتقل سيد مقتدى لان هالايام مو عالخط ، اعتقلهم واحد واحد ،، كلهم ارهابين ، لتخلي اي واحد منهم ، ما طول اجت براسك روح والهوا بظهرك ،، احنا وياك وايران وياك ومدحت المحمود جوة ايدك ،، يا ديمقراطية عمي ، هي گوة العراق مكتوب على گصته من ابن شارع لابن شارع ،، والمصيبة عدنا شارع اكبر ابن شارع .
