انكماش

انكماش
تأخر صرف رواتبنا، وعدد كبير من موظفي الدولة دخل مرحلة ( حرج مالي).
واشتغلت الحسبات .. وطالت الصفنات
كل واحد من عدنه يمه جدول يتطلب التطبيق والتنفيذ، والتزامات هواي وشي مرتبط بشي.
-شندور صرفة لهلوضع؟
_ والله ما ادري !!
أخاف هذي سياسة انكماشية تستند الى مقياس نقدي ( هلموجود) واحنه ماندري !!؟؟
وأي مقياس هذا اللي ما يلگه حلول غير راتب الموظف.. تتعكز عليه الدولة؟
العبادي نزلنه مراحل من سلم الرواتب! تذكرونها؟
أزين هاي شلون سياسة مالية اول ماتطبق علي آني الموظف – والحكومة بأيدها تختزل هواي مصاريف وتخفف من البون الواسع بين موظفي الدولة.
شلون؟ الريس موظف صح لولا؟ إله راتب وتقاعد وعدنه 3 رؤساء، اضافة لنوابهم، ومستشاريهم وموظفي مكاتبهم، زيد إنوب الوزراء ووكلاؤهم… والدرجات الخاصة ( والله هاي حيرتني) والعدد يكبر ، ممثليات قنصليات سفارات، حمايات، ارتال سيارات، مصاريف علاج، ونثريات ومكافئات وهبات وغيرها وغيرها. ليش ما يطبق سلّم رواتب الدرجة الاولى عليهم ويريحونه. ويخففون ع الدولة المتوجهة ( تدّاين من البنك المركزي -أدّاين حته اطلع فلوس أسدد وأربح- لو أسدد وانتظر الفرج؟؟
الارباك الاقتصادي سوته المصارف الوطنية والأهلية بعدم صرف رواتبنا وبيناتنه موظبين بشركات تمويل ذاتي.
– يعني هذا انتقال من تضخم الى تشوه اقتصادي
وبالتالي السياسة الانكماشية هي عكس السياسة التوسعية، ليش؟
– منو صاحب اقوى قوة شرائية بالسوگ؟ ومنو المحرك الفاعل بي؟
– الموظف
– ماكو خطة اقتصادية؟ إي نعم واخذ مثال ارتفاع أعداد الشركات الحكومية التابعة لوزارة الصناعة او الزراعة مثلا اللي صارت بحالة إفلاس بسبب انخفاض الطلب الموجه إليها، وتوقفها او تراجعها أمام المستورد.
تگدر تمتص البطالة بمشاريع زراعية ( كانتونات) تلم بيها الشباب ومصانع جديدة، تستخدم الطاقة النظيفة وعدنه شمس تجمر البسمار بالباب .. وتسوي مدن جديدة وتفك الخنگة عن مراكز العاصمة والمحافظات.
وتجارب دول بهلمجال موجودة ويمكن تطبيقها
اعذروني طولت
و هسة … الراتب إشوكت؟؟