انته ماتنشتم يابني واليشتمك ياشلش ملعون صيته
انت ديوان السلف وابن المروه والحجي الزين الحجيته
انت بوبه اهلال عيد الضيعيته ومامصدك من لكيته
منهو مثلك ياشلشنا بيوم ناداه الوطن هد بحميته
منهو مثلك وكف ضد الطأفيه وشال بجفوفه منيته
ومنهو مثلك من رصاص الغدر منخل صار بيته
منهو مثلك ياشلشنا كال لا للاحتلال وحلف مابدل هويته
انت يااجمل شلش شال العراق وماتنازل عن قضيته
هذا مو منا اليذمك واليشتمك وذا شتم من سجيته
شلون نشتم رمز من ارموز اهلنه وقلمك بدمك سكيته
انت كاتبنا اللذيذ النفرح وياه الفرحته ونبجي وياه البجيته
حق شعوب العالم اتفل علينه مو الاغم سوه
صتيته
من عرفته عاش نايم عالزباله اواصله الخيسه اللحيته
ومن تريد اتكله كوم وخيستك وصلت لذانك
ياعميته
يرجع ايشتمك ابعرفه وبنزاكه وبس عليك يذب
اذيته
لايخلينا نعينه من محنته ولايخلينا ندافع عن
ثنيته
شلون بينه وعود منا حاسبينه وهوه بالينه ابليته
يا شلش خليها سكته هذا مات وماكتب لحد
وصيته
ياشلشنا ايعينك الله على ناس مسودنه اوادم
هتيته
ولا أنا شنهو ذنبي وسقطوني ياذنب عدهم جنيته
يوم موطنه استباح وهدموه وانا كل العاده نعيته
كلبوا الدنيا اعلى راسي والمخيم ياشلش أنا السبيته
ياشلش ماأرد أطول و اكشف المستور واقرى الماقريته
ياشلش خلينا منهم ذول مانفعوا نفسهم يوم صار الوكت هيته
وانته تفهم مااقول وتقرى مابين السطور الي محيته
الك مني ياشلش مليون دمعه ودمعة الشاعر
تحيته.
* هذه القصيدة حصريا لموقع كتابات ولايسمح اعادة نشرها في مواقع اخرى الا بموافقة الشاعر – عباس جيجان
