السيد باراك أبو عليوي أوباما الورده.. أكتب هاي الرسالة بعد أن طكت جلاوينه وأرتفع عدنه السكر والضغط والمراره والقولون والفقرات والايدز وحتى فلاونزا المطي ..وكام واحدنه يمشي ويبول على نفسه وفوك ما الحكومه بايله علينه ..وصرنه نمشي بالشارع ومنعرف أحنه وين رايحين.. وكمنه نكتب أسمائنه بورقه وشايلين الموبايل ويانه حتى لا نتيه ..أقسملك سيدي , هاي صارلنه عشر سنين وأحنه متيهين بصحراء لا ألها راس ولا رجلين أبوعليوي بويه.. ويوميه يطلعنه واحد بعيو أيسوي نفسه هو من فتح أورشليم وحرر القدس ورفع علم العراق , مو ذاك مال النظام السابق , لا , هذا مال النظام الجديد.. وعلمونه لغه ما جنه نعرفها كبل ..لغه المخبر السرسري , شلون أندور شغله على جارنه حتى أنخيسه سنه أربعه أرهاب .. لغه بيها قسمونه الى ربع الغربيه وجماعه الشرجيه..شحجيلك سماحة السيد أوباما..أحنه شعب تحكمه مافيات ..عود عدنه دوله ومؤسسات مثلكم ..لا يا سيدي ..هسه عاصمتنه الحلوه بغداد أجروها العصابات وقسموها قواطع ..وبحماية أبو سراوي وفيلق القدس .. وراح قناة العراقيه أتعيدنه وغصبن علينه مسلسل ( يا علي أين أبني عمر )..وأحب أكلك أن مسلسل ( الكواتم ) ماشي سوكه والجماعه مد يقصرون بالسيديه والعامريه وطريق قناة الجيش وبعز الظهر, أي سباع لعد شعبالك.. ويوميه عدنه مصيبه حسين وروس مكطعه ومشموره بالزبل .. هسه لو أيرجعون الروس هم ميخالف.. لا هاي شبيك أشاقه وياك منريد الروس أنريد أمريكه .. واحدنه يا أبو عليوي, من يطلع من بيته , أيبوس جهاله ويمص مرته ويقره الفاتحه ويتوكل , ولو يرجع لو أيروح أبوله بشط..ويتريك فوك ويه المجاهدين كيمر ودبس..
عدنه أشباه بشر ساكنين بالكبور ويه الموتى لان ما عدهم بيت أيلمهم ويستر عليهم ..وعدنه ناس أدور بالزباله لكمه أتسد بيها جوعها ,لان متعرف طريق الحرام, أو بالاحرى ما كو مجال أتنافس اللغافه.. وأكو شغله أريدك تعرفها , بس صدك أنت تعرف كلشي.. بس لازم أكلك..الكهرباء , أنت تمانع أتصير عدنه كهرباء لو الجماعه همه ميريدون وكاضيها علس..لان ممعقوله دوله نفطيه صارلها عشر سنين وما عدها كهرباء ولا مي بيه خير.. وأنت أكيد تعرف شكد خيسو الجماعه من وره شغلة الكهرباء..سيدي أبو عليوي ..الجماعه يرادلهم جرة أذن بس قويه مو كرصه, هيجي جره وياها راشدي مربع مال أخو خيته , كون السياب يسمع صوته ..لان مثل هيجي سعلوات متجي بالعيني والاغاتي.. ما أوصيك أوباما الله أيخلي بنتك الجبيره ..
عدنه أبو سراوي ديشتغل أيسي ديسي وتري فيز, وميلحك..وماخذ العراق فلاحه ملاجه..من وره من كدام حتى وكفه ..أشيل هذا ويحط هذا ..وهسه طبب سي مدحت جوه أبطه..يعني ولايه ثالثه لو مطي يركب مطي.. وصايره بالقنادر مولانه..الصخول ويه الطليان دك مناطح..واللغف وصل لابو موزه..لا مو هاي موزه..هذا مصطلح عراقي بعدين أحجيلك عنه.. من أكلك يا سيدي أحنه متيهين صول جعابنه..متصدك..وأحب أبشرك..الجماعه من الهتليه والسرسرلوغيه خلصو الطاولات المستديره والمربعه والهرميه..وبعد مناطحهم بفلس.. ليش خليتنه بهاي الحاله..أخاف يجي يوم يتأسد عليكم أبو سراوي وزلمه..وأحنه أنروح بشربة ميه..وتالي أنعض أصابعنه ونردد أه يا ليل البنفسج..
وناهبات والناهبين بمجلس اللطم..مسويها مناحه وعايزهم بس باسم الكربلائي أيعددلهم..وصدكني وجودهم وغير وجودهم هبياض..لو بس أيخلون رؤساء الكتل والباقي أيشحتوهم كلهم..ويوزعون رواتببهم عالشعب المعفن..ها شكلت..راح تدرس هذا الموضوع..بس العباس عليك أوباما لا أطول..أحنه بأنتظارك..
والله أنت يا باراك أشرف من ذوله الجياف .. شلون وبلا لواكه..أنت منقذ الشعوب الخايبه..والمدافع عن الحريه ومصدر للديمقراطيه..بس يمكن صار شي غلط بالباكيت.. لان دزيتنه باكيت دكتاتوريه وتكميم الافواه..ويمكن هذا الباكيت ألفد دوله ثانيه مو ألنه, لان ممعقوله تخلصونه من الدكتاتوريه ونرد أنشوفها لابسه عمامه وبلحيه تعقد بس جايفين..وأحنه ممنونين منك لو تخلينه أحنه أنسوي باكيتنه..لان طكت أرواحنه وخلص صبرنه..
بس بشرفك أوباما لا تزرعنه بالصحراء فدوه ألعينك سيدي الله أينصرك سيدي..
وما خفي كان أعظم