سألني أبو جاسم قبل التظاهرة بساعات كَال ليش تروح للتظاهرة وإنت تصوم وتصلي؟ لأن السادة يكَولون هذولي يريدون يتظاهرون على المشروع الإسلامي، وذولي ناس ماعدهم لادين ولاديانه يريدون يسوون حكومة خلاعية وعركَجية ويشيعون في البلد الفساد .
طبعاً محد بيكم إيصدكَ انه بعد بالعراق أكو هيجي بشر فطير ونايم بالشمس، لاعمي تره أهواي منهم من جماعة تاج راسك وأغاتك ، ويروح فدوة العراق ومابي للسيد، واللي يجيب طاري السيد إلاــ تواثي.
آني حبيت أدردش ويه ابو جاسم وكَتله عمي إنت تعرف شنو الدولة المدنية؟ كَال غير هاي الكَتلك بيهه، كَتله عمي هو الدين يصير بكَلب واحد حرامي؟ كَال لا مايصير، زين إبروح أبوك تتذكر الصدر؟ كَال منوا منهم الأول لو الثاني؟ كَتلة لا الشهيد الثاني، كَال والنعم منه، كَتلة تتذكر إشلون جان يعيش؟ كَال شلون ماأتذكر …. كَان جان يجلس على حصيرة ماتسوة ألف دينار، وجان مشهور بالشيشة (اللالة) المكسورة، يكَلولة سيدنا بدلها هي بربع دينار، جان مايقبل ويكَول لمذا أستبدلها وهي لازالت تعطيني ضوء….. وجان يلبس ملابس عتيكَة ورخيصة، بصراحة جان يقلد الإمام علي بلبسه…. كَتلة زين أسئلك بروح أبوك شنو الفرق بين مقتدى وابوه، كَال شتقصد كَتلة بالمعيشة واللبس والسكن، كَال والله ما أعرف عنه اهواي ، كَتلة تدري يصعد بسيارة سعره ميت مليون دينار عراقي وتمشي وراهه سيارات كثيرة وبنفس سعرها، تدري كَاعد بقصر مثل قصر صدام، تدري يملك آلاف الملايين من الدنانير العراقية يشغلها في لبنان ويستلم أرباح كل ثلاثة أشهر، كَال عمي منين جاب كل هذا؟ كَتلة إنت جاوب؟ كَال عمي إلا لكَالة كنز وإستوله عليه، لأن هوة كَاعد لاشغل ولاعمل، عطال بطال، ويجمع تبرعات من عدنه …. زين عمي بروح أبوك أسئلك هل هذا يرضي الامام علي، يعني الكثير من الفقراء ماعدهم أكل يوم يسدون رمقهم والسيد يملك كل هذه الأبهه وفوكَاهة لابس عمامة رسول الله، كَال لا طبعاً هذا يغضب علي! زين عمي هل يقبل الاسلام هذا العمل؟ كَال لا طبعاً هذا يغضب الإسلام! عمي ابو جاسم التظاهرات ضد هذا الذي يغضب علي بن ابي طالب، ويغضب الإسلام، وتريد إترجع فلوس الشعب للشعب مو للحرامية هل هي على حق؟ قال نعم والله إذا هيجي الحجي طبعاَ على حق! طيب هسه تروح وياي إلى التظاهرة حتى نفضح هؤلاء السراق ونرجعهم على أيام الشيشة حتى إيصيرون أوادم؟ كَال طبعاً لازم أروح وأريد أكَوللهم الله حق وليس باطل … ونريد الحق للعراقيين …….. أودعناكم وباجر نشوف العمامة الثانية شداتسوي بفلوسنه.
