المالكي _ أغسل _ أيدك#

 المالكي _ أغسل _ أيدك#لو وضعت في يديك عشرة محابس , ما كو رجعة بعد .. عزلنا بح .. والمجرب لا يجرب .. أغسل أيدك بقاصر وتيزاب .. ومن صرت رئيس وزراء العراق , جان الشعب نايم وتعبان , لان جان طالع من دكتاتورية كلش صعبة , دوخته بحروب , وشد الحزام على البطون , وتبا للمستحيل .. ولمن حزب الدعوة , وصل السلطة , تبشرنه خير , وأبو تحسين لزم نعاله ودك بصورة صدام حسين .. لان هذا الشعب تعب هواي , كلش هواي أبو سراوي .. وتوسمنا بيك العدل والتسامح , لان من مبادئ الدعوة , السير على خطى أهل البيت , صلوات الله عليهم أجمعين .. فرحنه وهوسنه , ورحنه أنتخبناك .. أربع السنين الاولى خلصن , وما شفنه لا عدل ولا تسامح , وهالنوب أنتشرت الطائفية , وتوسعت مثل السرطان , وصار العراقي يذبح أخوه العراقي ,

ومدن قفلت كلها شيعة , ومدن قفلت كلها سنة .. وراح اللي راح , وخسرنا الوطنية , وحبنه للارض .. وقبل ما نروح للانتخابات الثانية , شاعوا سياسيينا الشيعة , أذا ما نروح للانتخابات , ترى السنة تاخذ السلطة ويذبحونا واحد واحد .. واحنا صدكنا حجيهم لان مسألة الديمقراطية , شغلة جديدة على الشعب .. ولان جانت الانتخابات قبل , نتيجتها محسومة , ميه ألا واحد .. وهم رحنا وأنتخبنا .. وهم فاز الحجي .. وبهاي الولاية , حفيد أبو المحاسن , لعب بينا تك كول .. وجانت أسعار النفط فوك فوك .. خلصت سنة وتبعتها سنة , وأحنا هب بياض , الجماعة تخمط , وتحول للخارج , وترجع مرة ثانية , وأحنا بعدنا هب بياض .. لا شارع ولا مدرسة ولا مستشفى ولا حتى برج طيور .. شعبنا عنده عادة مو خوش , من أينام , أيروح للوحه , بس يكعد ياكل ويرجع ينام , دكول مخدر .. وهم خلصن الاربع سنين , ولا شفنا طليان ولا بعرور ..

وهم صارت أنتخابات .. بس الشعب ما راح أنتخب نوري المالكي , بس تصوروا هم فاز أبو سراوي .. عمي شايل خرزة شاميه .. ولو قدر ولا سامح الله , تناوش الثالثة , جان صار الشعب , طشار واهليه .. بس ربك ورب الامريكان والايرانيين ومكتب السيستاني , شلعو أبو سراوي شلع قلع .. بس لازم الواحد يذكر محاسن الموتى .. بعهده ضاع ألف مليار دولار, ولحد اليوم محد لكاهن .. وخمط تلاثين مليار دولار من البنك المركزي , وهم ولا كواد لكاهن .. نص العراق سلمه لداعش ويه معدات عسكرية , تكفي لجيش كامل .. هجر الاف العوائل من حزام بغداد , ولا زال ولد الخايبه بالمعتقلات , محد يعرف بيهم .. صاحب الارقام القياسية بالصفقات الوهمية .. ما يستلم بيده لو تصلخه , بس عنده جماعة , يستلمون بلندن وطهران .. بأختصار , كان نوري المالكي أفشل وأردئ رئيس وزراء للعراق , وما سرحه بصخل .. وما خفي كان أعظم !!!
أنتظروني في الجزء الاخير………………………………………………….