هلبت كويكب أعمى طايح حظه مال غمان طاكه روحه من الدستور من صبات الاسمنت من سويمي العسكري من هويدي العامري من هالهوسه الجايفه , ويتيه طريقه ويفوت عدل بالمنطقه الخضراء..ويخمطنه الجماعه المعلك والطرح وبيك وبالطنب..ويشكهم شك عالبطانه وميخلي خير البيهم..وأليبقى منهم أيصير بيه شلل رعاش لو سرطان الثدي لو فلاونزا الخنازير ودوى ماكو ويبيع الكدامه والوراه وما أيطيب ويبقى عاله وكلمن أيشوفه يتفل عليه.. ليش ربي , وأحنه صارلنه شهر أنتابع هالنويزك, ونقره دعاء كميل ونصلي, حتى أنشوفه شلون يمسح هاي الشله السرسريه مسح من الكاع..جاه حتى أنت عرفت حظنه الوصخ خاتل أبلوعه ما بيها قبق.. عفت ذوله العلاسه ورحت عالفقره..مو ذوله يمك وجيفتهم واصله للمريخ..شوفهم شلون يتباجون عالوطن المعفن وعالعراقيين الجبناء.. وذوله الحفلك مو همهم الوطن ولا المواطن طبهم مرض وعساهم بأبو زايد.. بس خايفين على كراسيهم واللغف بالكوشرات..ومن تشوفهم دكول الايمان أيخر من فوك ومن جوه وأدكول همه سفراء المهدي..والمالكي هو المسيح اللي راح أيصلي وره الجعفري بجامع علاوي..وراح أينشرون العدل والمساواة..وخلصونه من الدكتاتوريه اللي جانت جاثمه على صدورنه.. وطلعونه من الخيسه ودخلونه بحيره كلها خره..شئنه أم أبينه..واليفتح حلكه ياكلها بأثنين أيده, أربعه أرهاب ويخيس ويشبع ضيم..
ومن وره عركاتهم راح جم أبن خايسه بالانفجارات اللي همه مشتركين بيها ويسهلون تفخيخ السيارات والعبوات ..جاه كولولي بالله عليكم..شلون سيارات مفخخه وتعبر سيطرات عدنان الاسدي ألمليانه أجهزه سونار أبو الزاهي..شلون عبوات تنلزك بالسيارات وميدري بيها عدنان الاسدي اللي سيطر على كلشي والامن أبجاله كام أيخر من جيب الصفح , فبقى بس العلم العراقي مشكله ..روحو أسألو هادي العامري وشلون ميلشياته تصفي الناس السنه بالسيديه والعامريه بأوامر قدسيه..روحو أسألو أياد السامرائي عن مخازن الاسلحه والعتاد اللي خازنها بالجوامع ..روحو أسألو عصابات الخزعلي شلون أتابع الضحيه من بيت وشارع الى أن تصفيه.. والمصيبه كل هاي العصابات تشتغل بعد العشره الصبح ولحد التلاثه الظهر..يعني أثناء الدوام الرسمي..ويوميه أكو قائمه بأسماء الضحايا ويوميه أكو جثث مكتوله بالكواتم.. يا جماعه ليش أكللكم يحتاجنه مو كويكب يحتاجنه كوكب أيدمر عقول هاي الطغمه اللي أبتلينه بيه..
وهاي يوميه أحنه عدنه طاولات ويوميه حوارات وكانت نتائج الاجتماعات أيجابيه..والازمه في طريقها للحل ..ودكولون هذا البلد ما عنده غير شلون هالجلاب والقرود راح تتصافى ..وجرب طكت الطكاكه وصارت أزمه..وضاعت كل اللجان التحقيقيه اللي تشكلت بصفقات الفساد..واللي خمط خلص وراح نبدي من الاول..وأحنه قشامر ونصدكم ونسمعكم ونرشحكم ونصفكلكم يا أولاد الخايسين..والمصيبه أنو جزء جبير من هذا الشعب العفطي أيسمعون ما أيكوله ألهم حرامي الكراده والجادريه لو صاحب حزب الله الجديد هويدي العامري.. ذاك اليوم رحت وي صديق للجادريه ونقلتنه سيارات الحرامي لاحدى القاعات اللي بيها عموري الحلو يخطب عالناس المعفنه ..وكبل ما أنطب للقاعه ينطون قوطيه عصير لو بيبسي كولا ..ويبدي أبن صاحب الزمان بسرد حدوته الحكيميه بأسلوب خبيث ويتفاخر بطاولاته المستديره والمربعه والهرميه..وبعد ساعتين غصبن عليك تسمعه ..يتم محادثه الشباب ويخيروهم بين التطوع بالجيش أو الشرطه أو وظائف بالجمله بس بشرط أن ترشحون فلان وفلان وفلان من المجلس الاعلى وتخلون أهلكم بيوم أنتخابات المجالس المحليه أيكتبون أسماء اللغافه الجدد..
شوكت نخلص من هالوجوه القذره ويصير براسنه خير..شوكت يجي الصبح ومنشوف ذوله السته المبشره بالنار بأذن الله..
اللهم أفقرهم وأنطينه..اللهم أمرضهم وأشفينه.. اللهم أكشف عوراتهم واسترنه..اللهم خذ منهم وأنطينه..اللهم موتهم وأحيينه.. اللهم طشر دولاراتهم وفرحنه.. اللهم عزيهم وأسعدنه.. اللهم فرقهم وأجمعنه ..اللهم أضعفهم وقوينه ..اللهم ألزك بيهم الفلاونزا وأشفينه, اللهم أطلبهم وخلينه, اللهم أجعل المنطقه الخضراء سوداء وخضرنه, اللهم أطحنهم وأحنه أنرشهم بأيدينه ..
وما خفي كان أعظم
