لازم أينغصون الطلعه..هسه أحنه مصدكنه طلع أبو سراوي ..وردناه يتنفس هوى طبيعي ..عكرو مزاجه وخلوه يرجع من وكت وحتى مضاك الصبور ولا سمج الزبيدي.. السالفه شنو.. من راح الحجي للبصره.. وصعد يلقي خطابه الثوري على بعورة الوسط والجنوب.. وهاي كلنه جنه أنباوع ونسمع قناة البركه العراقيه .. بس أشو أبو سراوي بعده مكمل خطابه ,أنكطع البث المباشر وطلعو أغنيه وطنيه.. حسينه أنو صار شي ..أثاري واحد من محافظي الوسط والجنوب, طكت روحه من الجذب والنفخ عن الامن والامان وسوى حزب اللغوه همه السبب في بقائنه على قيد الحياة.. وتهجم هذا اللي طاكه روحه على المالكي وجان كلش عصبي .. وكله للمالكي , أنت جزء من الفوضى اللي تعم البلد جراء سياستك الفاشله.. وطبعا الحفرفش طوقو المكان وصعدو ريس الوزراء بالسياره وأخذوه لدار الاستراحه.. واليوم أسمعت من حاشية أبو سراوي.. ما حدث بالبصره, هاي ضربه لحزب اللغوه ومفاجئه جانت للمالكي لا عالبال ولا عالخاطر..وهم زين مضربو أبو سراوي بالقندره العتيكه مال ذيج المره.. لان لو أبو سراوي شرب مي البصره جان عرف ليش هذا الشريف أتهجم عليه.. لو متوضي الحجي بمي البصره الصدك .. جان شاف بعينه الملح وهو يلزك بجسمه ..جان عرف ليش شعب البصره ميعرف يتلوك ويصفكله بالروح بالدم نفديك يا نوري ..محلوه ومتجي , ومو كل واحد تلوكله ..لان اللغاف خلف عبد الصمد, مشرحله هاي المشكله اللي صارلها سنين..لان بعد البصريين يشترون المي الحلو ويخزنوه مثل النفط ..لان صار عشر سنين ولا كواد فكر بهذا الشعب شلون يشرب مي مالح والنوب مر..
أني جنت كلش فرحان من شفت أبو سراوي طار بالطياره وراح للبصره.. كلت أي هاي فرصه للبصريين حتى أيراون المالكي البصره كلش زين..البصره اللي شافت الضيم..بذاك الوكت وبهذا الوكت.. البصره شعبها تعبان يا دوله ريس الوزراء..والبصره اللي بيها الجماعه أيلغفون, مثل نار جهنم أيحطون بيها ودكول هل من مزيد.. البصره مثل الجمل, أتشيل ذهب وتاكل عاكول.. الجماعه خلوك أتشوف الجزء الحلو من البصره..الجزء اللي جماعتك عايشه بيه.. جان المفروض تسأل عن البصره القديمه وشوارعها اللي ريحتها أختفت من سنين..جان شفت خمسه ميل والناس التعبانه اللي أطالبها اليوم أن تنتخبك يا دوله ريس الوزراء..البصره اليوم مو هيه القديمه..هسه عرفت وادمها..
رجال جبير بساحه سعد جان واكف..وسأل هاي شكو..مو صديم شنقوه..جاه شكو بعد هاي الهوسه..واحد كهوجي كاله زاير..هذا نوري المالكي..رد عليه وكال بالطكاك..أي ذاك مسوالنه شي..أتريدون هذا أيسوي البصره..
وما خفي كان أعظم
