المالكي..أنا ربكم الاعلى..أكو مصارع!!

ريسنه كضه وبعد لا يكدر يوكف ولا أيسوي تاتي تواتي ..وريس حكومتنه أتفرعن ويصيح أنا ربكم الاعلى..وعلى الجميع تقديم الطاعة والولاء..وبرلمان معتوه وأخرق وبيه العاهرات والعاهرين والغانيات والغوانيين .. شعب عفطي جبان طايح صبغه يخرب عالكفخات.. مدري شلون صارت ثورة العشرين يمكن كلها جذب .. بغداد أم الريحه الطيبه أتعيش مأساة وونينها يسمعه القاصي والداني وألوضع تعبان شكد متصورون..والساعه بالثمانيه المسا ولا جريدي بالشارع وكلمن كاعد أبيته وحاضن مريته وعالمولده وكبل حظر التجوال..لواء حماية بغداد الفلته وبعد ما ضرطت أتربعت.. سوى خطه جديده تخبل ..من أيصير أنفجار بمكان ,أيسون أزدحام بالسيطرات  خاطر أذا أكو بعد سياره مفخخه لو حزام ناسف , حتى يكدر المجاهد اللي أيفجر لشته يحصد بعد أكثر من ولد الخايبه ..ولكم يا قشامر شلون تطون فرصه للارهابيين وتسون أزدحام..وقائد هذا اللواء الارعن  نشر ولد الكحبه من باب الشرجي وأنت عابر جسر الجمهوريه وتنزل وتشوف بناية وزارة التخطيط بيها حوالي طابقين ماكو موظفين كلها قناصه وذوله اللي لابسين أسود.. وتطلع كبل ويم حيدر دبل أبو الفلافل أتشوف وحده من البيبان الاربعه للخضراء أمة محمد وأل محمد وبس .. المدرعات والدبابات ساده الابواب الاربعه.. ماكو سيارات لا خصوصي ولا أجره أتفوت بهذا الشارع..أكو كواد يطلع بهذا الوكت .. وتطلع على اليمين أدش بالعلاوي..أتباوع وزارة الخارجيه من كدام ومن وره , أدكول حرب بعد ساعه راح أتصير..كل أعضاء حزب اللغوه بالمنطقه الخضراء وكل صخل وحمايته .. مرعوبين ودك أسهال .. هاي حوبة العراقيين الله يمهل بس ميهمل حشه..مقرات حزب الدعوه كلها صبات كونكريتيه والحرس اللي بيها يحتل الصومال بنص ساعه.. خو لو تشوفون محافظة بغداد طريقها طبعا مسدود ومن فوك وزارة الاعلام سابقا أتشوف القناصه والدبابات وداير مدايرها جيش شعبي .. وهم طبعا لا صلاح عبد الرزاق بيها ولا أعضاء المجلس ..كلها خاتله وتمشي أمورها بالموبايل ..جاه هيه جم مره واحد أيعيش والنوب أيريدوها عاصمه للثقافه الهنديه..
وحسب ما وصلني من بعض الادباء والصحفيين العرب أكو رأي بتأجيلها الى وكت أخر..لان ولا صحفي مصري تونسي ليبي جزائري راح يجي .. وكلهم أيكولون الوضع الامني خطر في بغداد ..ويكلك عرب وين طنبوره وين ..أحنه بياحال وأنت أطك أصبعتين ..جاه والسبعين قندره اللي راحو بالفلم الهندي مال وزارة العدل..ولكم عيب شويه أستحو ولكم حتى دمهم بعده منشف..  وهوايه من طلاب جامعة بغداد بالجادريه ما داومو اليوم..خوبينه بالمشتل كل المدارس حداد عالطلاب الورده اللي راحو بالتفجير ..هسه أبو سراوي راح ينطي كل ميت مليون دينار تعويض بعد شيريدون ..صدك جماعه غاسله وجهها أبولها..وهوايه أيضا من أصحاب المحلات بقو بالبيوت.. واحد أهم شي حياته وحياة عائلته .. طز بالشغل ..منطقة اليرموك وهي سنيه أغلبها مطوقيها الجماعه من كل مداخلها اللي أيطبلها لازم من سكان المنطقه.. وعنده كارت أخضر يثبت ذلك ..والخطار مو وكته هسه.. شرطه ومطعمه بجيش في سبع البور ومناطق الدوره..خو التاجي صايره كولبه ..دك أعتقالات حتى سجون أبو سراوي مليانه سنه شاد كورته وياهم ..هذا أضطهاد بعينه ..
أبو سراوي أجتمع بالقاده المصخمين الامنيين الفلته من جماعة سعدون الدليمي وعبود كنبر وحط أيدك..همه ذوله البعوره اللي ماسكين الملف الامني .. لا قيم الركاع من ديرة عفج..بالله عليكم يا عراقيين..هو كنبر أحطه بخطه وأشلعه..غبي بذاك الوكت وأغبى هسه..لو جايبلي سعدون الدليمي اللي لا بالعير ولا بالنفير..جاه أنت يا أبو سراوي عايف اللي عدهم شهادات صدك من سانتيرز والكليه العسكريه ووطنيين ميه بالميه وحاطلي وين الفاشل والمخربط.. رتب أمورك أبو سراوي والله ضحكت الوادم علينه..
أبو نؤاس لو ما عيب جان بجه..ظلام دامس بهذا الشارع اللي جان أيضم الخضراء والبيضاء والحمراء ومقهى كلش حلو على ضفاف دجله وريحة السمج المسكوف أترد روح رواده..وبيه العشاق كتبو أحلى القصائد ولحد اليوم أسمائهم منحوته على الاشجار اللي بعدها شامخه برغم كلشي .. والله حرام أتشوف المنصور بدون راسه غلسو عليه الجماعه, ومحلاته الحلوه كلها معزله ومتصدك أنت بالمنصور اللي جانت السيارات والناس تزهو بيه.. منو يتوقع محلات الكراده أتعزل بالسبعه.. وين البسطيات وين ضوياتها.. لا أكلكم ولا دكولون ..أحسن واحد ينصبله خيمه بالصحراء ..حتى لا عين ألتشوف ولا كلب يحزن ..اللهم ألعن اللي جان السبب بتدمير العراق..اللهم راوينه بيهم يوم بس يوم واحد مثل ما راونه نجوم الصبح..اللهم أحفظ وأبعد كل شر عن العراق والعراقيين..وألجم حلك كلمن أيريد يشعل الطائفيه بين العراقيين..
وما خفي كان أعظم