اكثر شعب يسولف وينتقد هو الشعب العراقي وتلكاهم اربعه وعشرين ساعة يداهرون واحد ينتقد الثاني ، ولمن تريد توصل للنتيجة كلش ما تحصل الله وكيلك ومحمد كفيلك ، وطبعاً هذا مرض الدهرة ما راح يروح من العراقيين تعرفون ليش؟ لان ناس اتمولست واتعلمت بس تحجي ما تعرف الحل وعلى كولت العراقيين (جاي وجذب) يا عمي يا بعد بيتي يا هلي وناسي تره كفيلكم العباس ابو فاضل اذا تضلون اتبعون السيستاني وربعه وتريدون يسويلكم جاره كلشي ما تحصلون منه الزلم نايم بسابع نومه وما يدري بالناس طشت رشت !! انتم شبعتم ضيم من وره انتخاب الشمعة الحركتكم ومحد لحك عليكم ، ويوميه عبد المهدي الكربلائي مطلعكم سالفه جديدة وانتم مجلبين المرجعية يالمرجعية ادري انتم ما عدكم عقول ما تفكرون جا كلتم لرواحكم ها الزلمه النايم بالنجف لا حس لا نفس لا يطلع يصلي بيكم ؟ ينطيكم محاضره ، يحضر فواتحكم اعراسكم يزورله مريض هيج هو ضال بس يتعبد السيستاني ليل ونهار وما عنده مجال يكلف نفسه يزور الناس ؟؟ والله يا جماعة ان ما داخله راسي صاحبكم الفارسي، ادري انتم العراقيين شبيكم ما بيكم واحد عراقي ويصير مرجع وتقلدونه مجلبين بالايراني والافغاني والباكستاني والله يا عمي شهرتونه بين الوادم ، وحكومتكم هم دمج هولندي لو بريطاني لو ايراني لو صيني وحك الله ورسله صرنه مهزله جبيرة بين الدول ، سوولكم جاره لا تضلون بس تسولفون وتشربون جكاير ، وهذا مستفاد من الحكومة وما يحجي وذاك مستفاد من الحزب ومغلس والأخر مسوي روحه شيخ وبيوم الانتخابات ينطونه قاط لو مسدس وضل يصيح ابو سريوه لو ابو عتوي بس هو وبس ادري لجندوب تبقون هيج؟؟
