الضحية #كرار_نوشي واسئلته الاخيرة !

كلما اريد اكتب شي عن كرار ….ماكدر
تهيج عندي كل المواجع وتحترك حتى الحروف….
ياااااااه شكد اذوك يا كرار قبل حشرجة الموت الاخيرة بروحك الخضرة …
شكد ظلموك وانته بيهم تتوسل وتكول ماعندي شي …
ومااذيت احد ..
بس لبست قميص اصفر احب لونه…
وطولت شعري ..
عجبني سوار بيه خرز صغار اشتريته من بسطية بشارع المتنبي ولبسته. .
اعرف الله واعبده ..واعرف كل الانبياء وال البيت ..
اشوف امي من زغري توزع نذور بين بيوت الجيران توزع خبز العباس وتكوللهم اقروا الفاتحة لام البنين…
ماعرفت شكل الدين والاسلام الجديد مالتهم وكت يصير فرجة للعالم وهو يصلي بنص جامع لو حسينية متجتف لو باسط ايده وتربة فوك سجادة …لو بنية تلبس ربطة وتكول اني علوية وجدي رسول الله! ماعرفت الدين هيج الا هسه ..
كل مواهبي احب التمثيل والغناء وفرحت هواي لمن قبلوا اشارك بعمل مسرحي وية اصدقائي وشفت الفنانين العراقيين بالحقيقة مو بس بالتلفزيون …
استحي احجي مرات بس بكلبي هواي احب الناس ..
فلوس وبيوت محصنة ماعندي بس ويه اصدقائي احس اني ملك زماني .. الدينا كلها كدامي واحلامي جبيرة..
شنو ذنبي ؟
بعصا قاسية تضربوني؟
ومن شعر راسي تجروني؟
واقسى الاهانات تسمعوني؟ وتفرضون عليه شكل دين ومذهب وعقيدة..؟
شنو اذيتكم وشنو سويت؟
كراااااااااار..
اسئلتك مثل السيف تنغز بروحنا ..
كراااااااااااااااار
ياوجع كلبي عليك وانته تهيج جروح روحي ..وتعيد صرخاتي يمهم وهمه مايسمعون…
مايسمعون والغيظ مالي كلوبهم وعيونهم حاجبها ستار اسود
كرااااار ياشمعة انطفت كبل اوانها وكبل ماتخضر ورد كدام اليمرون…
ادري روحك تفرفح هسه وانته تشوف عصرات قلب امك وخواتك ينوحون عليك…
ادريك بحسرة سؤالك ظليت تكولها قبل موتك….
ولسه مادريت شنو سويت …
ولسه مثلك احنا ياكرار مادرينا جريمتنا …
كظينا عمر بس انطبق احكام ونكول نجفي الشر ..
وهم ماندري لشوكت الشر يخلص … وشوكت نتحرر..
الك الله ياكرار..يمه ماينظلم احد
بس احنا البشر صرنا ناكل بشر
وصرنا نقومها قيامه الله كل يوم …
روح كرار وارناح عراقنا بس الخوف بيه باقي واتشرد اهله وناسه وظل يومه الجاي اتعس من الي راح…
روح كرار وارتاح …محد يدري جريمة واحدنا شنو من يتعلك مثل الخروف والناس بلحمه تشرح وتضحك …
ارتاح كرار… عراقنا بس للاموات والحسرات باقي ..