بما اني لا أمتلك سيارة خاصة، ولله الحمد؛ فأستقل سيارة النقل الخاص (الكيا)، مما اتاح لي فرصة الاختلاط الكبير مع طبقات المجتمع كافة، والمسحوقة بشكل خاص، فأسمع منهم آلامهم وشكواهم ، وذات مرة جرى الحوار الآتي وأنقله كما هو بالهجة العراقية (العامية) :
* ياأخي ما أدري السياسيين هذوله! ميفتهمون؟! لو يردون يؤذونه؟! لو شنو؟!
* لا همه ما يريدون يؤذونه، همه يردون يبوكَون !!
* أدري يعني ما كافي؟ ماشبعوا؟! مو هي تاليها يذبونكَ بمتر من التراب، وحتى محد يترحم عليهم؟!
* لا اخوان تره ما معقوله كلهم حراميه!! لازم بيهم شريف؟
* يابه وياك، بيهم شريف، وما يبوكَ، وينه؟، هي وحده من اثنين لوما بيده شئ، وخل يوخر، لو مايفتهم وهم خلي يوخر، ياأخي تره ميصير هيج، مو والله بزعنا!!
* تراجع دائرة من دوائر الدولة تبتلي على عمرك!، وأسبوع ماتخلص المعاملة!
* مي ماكو ، كهرباء ماكو، مجاري ماكو، سكن ماكو، وشغل؟! اذا اكو! فتنسمط سمط ياله توصل، من ورى الازدحامات مال السيطرات، وأنوب حجي المسؤولين اليشكَ الكَلب!!
* هههههه يطلعلك واحد إيشبه نفسه بالامام علي وولده بالحسن والحسين، ونوب يكَول فاتورة حسوني مال الموبايل هذا الشهر 4000000 دينار بس؟! يعني راتب 8 موظفين، كل واحد براسه عائله من سبع نفرات وأكثر …
* والآخر راح صلح (…..) بـ 59 مليون ويكَولون أكثر!، وناس صارله سنين تعاني من امراض خطيرة، محد يسفرهم لو ينطيهم دينار واحد!، لا ونوب لاف عمامة! لو يشد بيها (…..) أحسله!
* هههههههههههه لا والحلوة هاي مال يطلعون مجتمعين وكدام كل واحد ماعون بيه برتقاله وموزة وتفاحة، وكلاس شربت وبطل مي !!، أدري إذا جوعانين اكلو وتعالوا أجتمعوا؟!! لو يردون يحركَون كَلوب جهالنه!! جا جهالنه ما بيهم بخت! إلنه الله اليطلع حوبتهم …
* ونِعمَ بالله … بس المصيبة همه كلهم يدّعون انهم متدينيين ويخافون من الله!
* حتى كرهونه باليحجي بالدين!!
* لا اقوى شئ، شايفين برنامج خارج المألوف؟!، مال العراقية شبيكم!!
* أي شايفينه!
* شفتوا من يطلعون المسؤوليين، وبيوتهم الي تخبل، وحدايقهم، والنوب يطلع المسؤول يفتر بالسيارة بشوارع بغداد، ويسولف على الدول السافر ألها؟!! .. وورى البرنامج يطلع يحجيله 5دقايق يسوي روحه بس هو وبس! وما يهمه بس الفقير! هسه اذا فرضنا الله منطيك، وفلوسك حلال، ما نكَول شئ، بس انكَول الفقير ينقهر، وانت ما مجبور على هيج برنامج، ماراح تحصل منه بس المسبه .
* عمي يافقير!! والله لايعرفون فقير ولايعرفون الله ! وكلهم جذابين وحراميه
* لا والحلوة ما يستحون، حتى اذا يبين جذبهم!، وواحد يجذب الثاني ، ابوالكهرباء يكَول صوج ابوالنفط، وابو النفط يكَول اني كاعداجهز!، خوب ألمهم(أجمعهم)، وأكَابلهم واشوف ياهو الجذاب؟!، بس هوه جبيرهم يكَول يجذبون عليه!، على ساس شلونك أنته؟!، الجيش ما كَدر يجيب الأرهابي، وحمودي جابه! من انهجم بيتك على هالصلخ!! جا ما توديه على داعش؟! …
* أنوب أبو المولدة كَالو 6000 دينار للأمبير، أخذ 7000 دينار ، كَالو يشغل من 12 الظهر للـ 6 الفجر، الأخ يشغل من 12الظهر للـ 4 العصر ونوب يشغل من الـ 7 المغرب يطفي بـ 4 الفجر، واذا تعاتبه يطفي المولد ويكَول عاطله، وروحوا اشتكوا وين ما تردون! لا خوش دولة قانون!
* لا وانت حصره عليك الكهرباء! يطلعلك جبيرهم يكَلك راح نصدر! سولفها عل دبه ههههههههه ….
وللحديث بقية……..
