الرسل والانبياء معصومين من الغلط .. هذا متفق عليه .. والانبياء ميختارون أصدقائهم بكيفهم .. الله سبحانه هو اللي يختار للنبي المنتخب الزوجه والابن والبت والاصدقاء .. وينبه المعصوم من كل خطأ يمكن أن يوكع بيه عن طريق الوحي .. وهذا هم متفق عليه.. هنا أقصد أن الله جلت قدرته هو من أختار لموسى هارون ليشدد به عضده.. وأكو قصص هوايه كيف أن الله سبحانه أختار الزوجه الصالحه للانبياء كزوجة لوط  وأصلح الاخريات والابن الذي ولد نبيا لسيدة نساء العالمين وكيف أغرق الله أبن نوح .. وهاي كلها عبره وموعظه للناس اللي أجتي من بعدهم .. وعندما أصطفى الله محمد نبيا.. أختار له الزوجه المؤمنه.. وخلق له الزهراء البتول اللي بأمر الله تزوجت أبن عمها علي بن أبي طالب.. وأثناء بعثة الخاتم الامين أختار له رب العالمين أصدقاء أوفياء مثل خديجة الكبرى وأبو بكر ومن بعدهما عمر وعثمان وعلي .. أقصد أن الله يعرف ما بقلوب الاخرين وهو علام الغيوب.. ولو جان أكو حقد وكراهيه بكلوب أبو بكر وعمر وعثمان على النبي المختار مجان رب العزة بقى صخل منهم بجانب رسولنه الكريم .. جاه شلون نبي وميعرف بأصدقائه..وهم جان الله دز الوحي للرسول وكله ذوله خوات كحبه دير بالك منهم وأبتعد عنهم لان ذوله أيدورون عليك ملفات تأمريه .. وأكيد كلنه نعرف صحابة النبي الامي كلهم كرايب وأهل وناس مزوجه من ناس وتشوف هذا ماخذ أخت هذا وهذا مزوج بت هذا ..الشغله جاهيه مو كوتره لان هذا نبي مرسل من الخالق..لحد هنا ماكو زعل ومتفق عليه..
من ألف وأربعمية سنه مجان أكو هذا سني وهذا شيعي وهذا عربي وهذا كوردي وهذا مسيحي.. كل الناس سواسيه وعمل الانسان هو اللي أيحدد خيره وشره.. وأكو خالق الكون هو اللي أيقرر مو المالكي ولا علاوي ولا مدحت المحمود.. وخلي أنكرب المسافه بعد أكثر.. بالتلاثينات والاربعينات وحتى السبعينات من الكرن الماضي ,كل هاي الطوائف والمذاهب والاديان جانت عايشه حايط  بجانب حايط .. والمسلم ياكل عندي المسيحي وينام أبيت اليهودي.. وبالعكد من أيصير شي أتشوف الكل أيصيرون أيد وحده.. منعرف هذا شنو فصيلته وذاك شنو هدفه.. كلنه عراقيين .. صدكوني أكو هوايه مسيحيين ومن مذاهب العراق الاخرى جانو أيروحون ويانه لزيارة العتبات المقدسه ويطلبون النذور والشفاعه من الله عن طريق المعصومين والصالحين.. لان جانت نية العراقي صافيه مصفى وما بيها دغل..
أكثر ناس تريد تشعل الفتنه همه الايرانيين ويساعدوهم لحد اليوم أمريكا والماسونيه اللي شغلها تطبع ألاف الكتب اللي تحرض على الطائفيه, وشكال عمر وشحجه علي, وهذا كسر ضلع المعصومه وضرب الباب وحصر الزهراء وره الباب وأنكسر ضلعها .. أني أسأل اللي عنده عقل مو الفتان اللي ينصر الباطل على الحق .. الامام علي مو جان بالبيت وما سمع صياح الزهراء يا كاع أخذيني وطميني .. يا جماعه هاي الزهراء بنت المصطفى وزوجة علي داحي باب خيبر ..هاي مو قوات سوات تضرب القيم والشرايع كلها ودش وتحصر عجوز سنيه وره الباب ..صدك جذب تعبر هاي الفيكات علينه ..وبعدين منو اللي يسترجي ويكول أني من ظهر أبوي ويدخل بيت الامام ..وطبعا هذا أيصورنه أنو الامام علي وحاشاه, ضعيف وخلي يخسر شرفه, بس يبقى الاسلام موحد .. هذا مو حجي يا مسلمين ..وهذا ينشر أن الانبياء لا يرثون جاه شلون تريد الزهراء بستان فدك ورث أبوها.. يعني أبو بكر زمال أبن زمال .. بس أريد اللي وصلنه هاي الخزعبلات اللي من وراها تفرقنه وصرنه شيع أقسم بالجليل لو ظهر النبي الكريم مره ثانيه جان أدين بالارهاب وكتلناه مثل ما كتلنه الحسين بالكوفه ..
صدكوني قريت كتب بمكتبات بلندن على مدى أربعين سنه تثير الرعب ,ولو ما عندي عقل جان لزمت شكو سني من أحفاد معاويه النواصب وأذبحه من الوريد للوريد.. وأسست مليشيات متسمي على كل سني ..وطبعا ذوله اللي كتبو هاي الخرافات تشوف أسماؤهم, كلها العلامه طيزان وأية الله زربان ,وطبع في لندن وتهران وبيروت.. ومثل ميعرف العراقيين أكو ومع الاسف رجال أعلام بارزين وكتاب مثقفين وأقلام مدفوعه الثمن تساعد على ترويج ما ينشر وتسهل توزيعه بشكل سلس حتى يوصل للعراقيين وللمسلمين بشكل خاص..وبالمقابل تسمع بعض فتاوي المذهب السني وهمه أيكفرون الروافض الزنادقه اللي أيعبدون ألهة من دون الله سبحانه.. وهاي معاهد البحوث تنشر وترسل هاي الكتب اللي أغلبها توصلنه من جمهورية أيران الاسلاميه وتغسل عقول الشباب بخرافات وأساطير وتغذي الرواديد بقصص ما أنزل الله بيها من سلطان حتى واحد يكره الثاني وميستقر وضع الاسلام الحقيقي اللي تأسس على التقوى..
وعلى فكره, لو تتوسعون بالبحث الاسلامي الصدك, راح تشوفون أن الامام علي جان مستشار والامين على بيت مال المسلمين بوكت الصحابه التلاثه وجان مثل المرجع والعالم بأمور الواقع..يعني مجان أكو تفرقه وحقد لا على الامام علي ولا على الصحابه..واللي كتبو التأريخ جانو متقصدين بث سموم الفتنه بين صفوف المسلمين وأستمرت عبر التأريخ وأستقرت بعقول الاجيال الجايه.. وعلينه تفعيل حقيقه واقعه لا الشيعه يكدرون أيعيشون وحدهم بهذا البلد ولا السنه أيريدون الانفصال عن الشيعه لان أثنينهم أيرجعون لشجرة النبي العظيم , وأن أنزيل حقد 1400 سنه من خلال رفض كل تصريح طائفي من هذا أو من ذاك ونشعل صفحة اللي خلفوه وبأقلامنه ونحركه وأذا نكدر أنرجعه للصواب أو أنشمره بالزباله ونبول عليه .. تمام لو لا.. والعاقبة للمتقين..
وما خفي كان أعظم