انشال الرادع مات الخوف – اخسرنه الجزَّه اخسرنه الصوفْ
يا حيف احْـتـرنَه ابهالملَّه
اتماشـيهم تطـلعـْلـك عـلَّه
حتى الگلب الصاحي اتسَلَّه
لعبه اوصارت ..عَ المكشوف – انشال الرادع مات الخوف
***********
السان اطويل .. ايعّد امجادْ
نحچي انصَيح بَسكم عاد !
ارجال انريد اوكلهَ اشداد
چبير الشگْ اشلون اتروفْ ؟ – اخسرنه الجزَّه اخسرنه الصوفْ
************
هالرادعْ بينه مبتلي
هذا الك هذا إلي
مَگرود يالمالكْ ولي
ماضل مـَرْكَبْ لا مَشحوفْ – انشال الرادع مات الخوف
************
يا رادع يا ضمـيـر
حطلك اعمامه واستشير
چـبـيـر يفتي والزغـيـر
شامي اوعامي فيلسوف – اخسرنه الجزَّه اخسرنه الصوفْ
***********
بالغربَه اولعْـبـوهَ اللعبَـه
گـَـبْ البَردي اوصارَتْ لَهـبَـه
اشويـَّه اوتـخفتْ .. ماهي صَعْـبَه
گلب ايسوف اوعين اتشوفْ – انشال الرادع مات الخوف
***********
ياهو اليجي..صاح الشَرَفْ
خـبـطتْ خَـبـط ماتـنـعرفْ
وابـغـفـله بـَـدّلْ وانحـرَف
والريـش طايـر مَـنـتـوف – اخسرنه الجزَّه اخسرنه الصوفْ
**********
كل يوم نـفـتـَـح فَدْ مَلفْ
ليويَنْ يـنـزف هالنَزفْ ؟
للچذبْ صايرْ محترف
لا ضل صوفْ او لا ضلْ گوفْ – انشال الرادع مات الخوف
**********
أذتـنـَه اهوايه الهوسات
وصلتْـنـَه الهاذي المأسات
نتقسم چم جوگه اوجوگات
ياطين الحنَّه المَدْيوفْ – اخسرنه الجزَّه اخسرنه الصوفْ
**********
امكرش لگـْمِـتـَه دَسْـمَـه
مُـهَـربْ .. بالسجـلْ إسمَه
ضَيَّعنَه العرفْ وانگولْ..هَمْ قسمَه
شَعلينَه يَعَمي .. عوف..! – اخسرنه الجزَّه اخسرنه الصوفْ
**********
من تحچي القوافي تموت مَخنوگه
شيفيد الحَچي والطاوَه مَحْروگه
الهاونْ يدگْ .. والدّگه مدگوگه
والگطنْ الأبيَض..مَندوف – لاكو جزَّه اولاكو صوف
انشال الرادع مات الخوف
