خليفة الارهابيين انكتل و الدكتور تحسين الفلاني (تحسين ابو الليل) انشق عن الحكومة و صار ويه داعش و اختبروه بچم معلومة و عنده فلوس يدعمهم بيها فاختاروه من وره خشمهم يصير خليفتهم مكان الاول و تحسين مكتوبله الحكم وين ما يروح و اكيد وافق (منو يگدر يعارض قرار لداعش و يضحي برگبته) و صار الخليفة.
صارت مسؤولية العمليات الارهابية براسه و الامراء و العناصر بيده و صار مطلوب دولياً و من الشعب العراقي و طلع بيان بإسمه “ابو فلان الفلاني” و الانصار العرب و الاجانب يمدحوه بالانترنيت و الفيديو مالته وصل مشاهدات بالالاف باليوتيوب و صار عنده خدامات و جواري.
عجبته الشهرة و السلطة الي بيده و ويه الزحف الي صار لداعش صارت مناطق هواي بيده و الغنائم و الفلوس و اهم شي البنات الي ياخذوهن غصب من اهلهن و يجيبوهن اله و يبيعهن بسوريا و ياخذ فلوسهن و البنات الي بقصره ما مخلياته يحتاج شي (بالحلال طبعاً) و شاف السالفة احسن من البرلمان و طلايبه.
بس اكو جماعة يريدون الخلافة كونهم اقدم و عدهم تاريخ بالجهاد و منزلتهم عند البغدادي چانت اقرب و يشكون بتحسين چذاب و يخططون يسوون انقلاب و عصيان عليه و يخلصون منه و تحسين ملتهي بالجواري و ما يطلع من مكانه و ما يدري شنو القصة و العناصر خاليه براحته يمارس طقوسه الدينية (حسب اعتقادهم).
و راحو يزوروه و تحسين استقبلهم و جلسة ايمانية و نورانية و استأذنهم تحسين يروح بشغلة و يرجع و عافهم و الجماعة لمحو تلفونه و سحبوه و گلبو بي و شافو صورته و بصفه كاس مال عرگ و صور ثانية اله ويه فوفو و رجعو التلفون بمكانه و اجتهم فكرة شيطانية يفضحون تحسين گدام العناصر و يقيمون عليه الحد و يجردوه من الخلافة و اكيد رح تصير الخلافة من نصيبهم.
وره ما نقلو الصور بالبلوتوث راحو و لمو اكبر عدد من العناصر و الامراء و گالولهم تحسين شرب الخمر و ارتكب الزنا و لازم نقيم عليه الحد و نختار خليفة صالح نظيف من الكبائر و اتفاعلو وياهم العناصر و جابو تحسين بساحة عامة و وره ما اتبرأو منه رادو يجلدوه عقوبة على الزنا و وراها يعاقبوه على الشرب و مددوه و ويه اول جلدة فز تحسين من النوم و شاف نفسه بغرفته و الساعة تسعة الصبح و حمد الله على نعمة البرلمان.
