كلها اتغيرت اوجوه دولتنه
وابشرك من زحل جابو حكومتنه
كتل صارت جديده وكلها بالباكيت
لوعرف الغنه چا بيهم تغنيت !!
ساسه من الزلم والكوته لم البيت
ياهو الكَال رجعت نفس شلتنه ؟
الناطق الرسمي محفحف ومزيون
نتمنه لچهرته نصير تلفزيون !
من يحجي عبالك عنده علم الكون
وراح بكل سهوله يحل قضيتنه !
التشكيل الوزاري اختاروا الطاقات
وابشرك بالمجالس مابكَت جكمات
لعيون الشعب حصريا الحلوات
بهاي السالفه كفّو جماعتنه !
حصل تغيير فعلا هلتشوفه العين
فراريش الوزاره تبدلو موزين ؟
خو حصة الجنوب تضاعفت مرتين
واهل بغداد كالو خذتوا حصتنه ؟
اذا عل الحسبه هاذي نشلّه ونختار
الوزاره الجايه حصرا لاهل ذي قار!
وزير من العكيكه وواحد من الطار
ورأس الهرم طبعا من مدينتنه !
منهمش الربع بالجهه الغربيه
تكريما لظافر ياخذ الماليه
أله خبرة عمل بالدولة الاسلامية !
عادل من يوزع بيده ثروتنه !
منجرب المجرب سمعا وطاعه
طاحت عل اليچذب كون طركَاعه
الصوچ من الشعب ماسرفن ذراعه
مثل ماسرفنوا اعضاء كتلتنه !!
