يروى عن ايام زمان كانت مدرسة ابتدائية في ابي الخصيب كان فيها طالب اسمه صويلح وكانت مرشدة الصف عندما تناديه ( صويلح الاثول ) والطلاب تضحك عليه — صويلح بعد مايتحمل راح الى ابوه واخبره بالموضوع الوالد ما كذب خبر اخذ صويلح وراح على المدرسة ودخل على المديرة وشكى لها تصرف المرشده مع صويلح المديره هم ماكذبت خبر بعثت على المرشدة وقالت لها ليش انت دائما تنادين على صويلح بالاثول والطلاب يضحكون عليه والاب جالس يستمع الحوار — المرشده قالت صويلح : روح ماما شوفني اني بعدني بالصف لو جيت للادارة ؟ راح صويلح يهرول للصف ويدور هناك ورجع وقال لها ست انت ماكو بالصف ؟ قالت عفيه صويلح الشاطر : زين روح شوفني يم الحانوت ؟ هرول صويلح للحانوت ورجع وقال لها ست انت ماكو هناك ؟ رجعت قالت ماما صويلح السبع روح شوفني اخاف اني بشعبة – ب – ؟ راح صويلح يركض ورجع بعد شويه وقال لها ست دورت كل الشعب بس مالقيتك ؟ التفت على ابو صويلح وقالت حجي هسه عرفت ليش اصيحله ( صويلح الاثول ) الاب تنحنح وقال لها ست هو دور عليك بكل مكان وما لقاك يجوز انت ماخذه اجازة ؟ المرشده شكت الزيج وطلعت تهرول بالشارع وصاحت بطلت بعد ما اشتغل معلمة — سالفتنه وين يم رئيس الدبلوماسية العراقية حيث التقى مؤخرا مجموعة من الاعلاميين وسألوه استاذ ابو القماقم ماهي اجراءاتك حول انحسار الماء عن نهر دجلة واجابهم مثل صويلح هذ ما ننتظره لظهور المهدي ولم يعرف هذا الاثول ابن الاثول ان الشياطين هربوا من بلادنا بعد ان امتلآت شياطين ودجاله من امثاله فكيف سيظهر المهدي وهذه الزمرة التي تطبل لظهوره وهم قتله ومزورون وسراق ودجالون ؟ بالامس القريب اشاعوا القتل للابرياء بحجة التعجيل لظهور المهدي واشاعوا الفساد والخراب بنفس الحجة هل سأل هذا طبيب الاطفال الفاشل والحملدار نفسه ما علاقة وزارة الخارجية بمهنته ؟ وهل سأل نفسه مالذي كان عنده وما الذي اصبح عليه الان ؟ وشعارهم الاغلبية لازم تدير شؤون البلد — من طاح حظ البلد اللي امثال هذا الاثول من الاغلبية التي تدير شؤون هذا البلد والذي لا يعرف ابسط معلومة يعرفها طالب الابتدائي وهي منابع دجلة والفرات حيث قال انها تنبع من ايران ها دعوجفري .
