خطيه أحمد أبن أبو سراوي أشترى ذاك الاسبوع قصر دجله اللي يرجع الى ورثة أحمد حسن البكر ,على نهر دجله يم الجسر المعلق بس ب12 مليون دولار..هذا القصر يضم تلاث فيلل, كل وحده مساحتها 1200 متر ..وجان كاعد بالقصر خطيه محمود المشهداني , أي عيني يالله أيكفيه ..بس نسوانه يرادلهن مجمع ..وحمودي أنطه بس تلاث ملايين دولار خلو حتى أيشيل المشهداني.. وين يكعد هاي ما أدري..بس يمكن راح يكعد بمشتمل يم بيت أخته بالكاظميه.. هذا حال ألما عنده بيت تره هم خطيه.. وتره محمود المشهداني أيده كلش بيضه وميحب الحرام وحتى من جان كاعد بالقصر, أبلاش وميقبل يدفع أيجار ..لان جان يعتبر هذا بيت الشعب وهو من الشعب .. فعيب يدفع أيجار .. أنسان نزيهه وهو الوحيد اللي طلع من المسؤوليه وكلها تشهد على نزاهته ..الله أيبارك بهيج رجال, وهمه هوايه بهذا البلد الجايف.. وحمودي أبن أبو سراوي جان أيضم راتبه مال كل شهر يم أبوه.. وخطيه جان ميصرف ولا سنت منه..أي رواتبه زائد عمولاته ويه الاوفرتايم يا دوب صارن 12 مليون وأبوه جمله الباقي ..وهاي دايما أكول لجهالي ضمو فلوسكم حتى تشترون بنطرون لو قندره لو دشداشه..والله عفيه عليك حمودي..لازم الواحد يستقل ويكعد أبيت بوحده..جم دوب الابن يكعد أبيت أهله..لا أحسن وزين سوى..باجر عكبه يزوج ويجيب جهال ..وبعدين بيت أبوه أيصير كباله, بس الشط بينهم..ويكدر أيسوي بلم والعصريه أيروح ألبيت أبوه يتعشى ويرجع بالبلم شكد حلو..هم أيصرف الزقنبوت وهم يشتم هوى نظيف مو حكومي ..وحسب مشرحلي الدلال اللي بالحارثيه وسوى عقد البيع وطلب مني ما أذكر أسمه أي خطيه..كلي هذا القصر رادته السفاره الفرنسيه ودفعت بيه خوش فلوس..بس حمودي أبن أبو سراوي جان رايد هذا القصر من زمانوهسه أجتي فرصته ودفع كل المبلغ وسجله بنفس اليوم..والله أني كمت أحجي عالدلال.. يعني حمودي أحسن لو الاجانب..عالاقل هذا أبن ريس الوزراء..وفلوسه كلها حلال مال تعب جم سنه ومزكايه ومخمسه..لا والله أني زعلت عالدلال..كلتله شلون تقبل أتبيع كاع عراقيه للاجانب.. والله عاد حمودي أبن أبو سراوي أستخدم شويه خشونه وحصل عالقصر بسرعه..
وجنت أكول وبعدني أكول..أذا جان الاب خوش زلمه , الولد أيطلعون مثل أبوهم..ونعم التربيه..كبل المالكي من عاش بالشام جان شكد عصي ..والليره تطلع من جيبه بالكوه أدكول لازكه بجيبه.. وهسه حمودي طلع مثله ويصمد رواتبه وكدر بعون الله أن يشتري قصر دجله..وكبل فتره هم شفت حمودي أبن أبو سراوي خطيه جان بفرنسا..يمكن شغل عنده..وهم حسب معرفت أنو أشترى فيلا تخبل بس الطريق من الشارع ألحد الباب الجبيره حيل شكبره وبيها سياج عالي وحديقه مدوره تعقد.. وكل صاله تكفي لثمانين عراقي ويه جهالهم وزوجاتهم.. والثريات اللي تنزل من فوك , وشلون درج شعرضه وجم غرفه نوم أدكول فندق ..بس عفيه عليه ..أني أحب الشاب اللي ميكعد ..والشغل عنده أهم شي..الله أيبارك بيك حمودي..ها كبل ما أنسى..واليخت مال الدكتاتور صدام حسين, أيكولون أخذه حمودي وسوى جوله بيه بنهر السين أباريس هنيالك يا عم .. لا لاتخاف أني ما أحسد وحتى أليقرون هذا الموضوع ناس شايفه لا تخاف..
ما أدري ليش أولاد الجلاب يعتبرون العراق جزء من ورث أجدادهم المعفنين..ويشيردون ياخذونه غصبن على أكبر شارب أذا بقى بهذا البلد زلم..وأحنه ننتظر الراتب شوكت أيحل ضيف بجيبنه حتى نكدر نشتري قندره جديده من سوك البياع أم الاربع تالاف ديناررررررررررر..وطز بالوطن!!
وما خفي كان أعظم
