“إنته خاب”
جلمة إنته: معناها يعني بالعربي أنتَ وبالإنكليزي يو وبالفرنسي تو… وإلخ…
وكتبتها إنته لأن سوك الكتابة هسة هيجي يريد إنته وإنتي لكن آني أكيد ما يعني مقتنع بيها…
أما جلمة خاب: فهي كلش معروفة عدنا وما محتاجه لأي توضيح لأنها رفيقة مزمنة لأجيال وأجيال في بلدنا الحبيب والسليب…
إلزم أي واحد من مواليد 1980 وأكبر وإسأله معنى هاي الجلمة راح يسطر راسك بالأمثلة والأحداث والبراهين اللي توضح معناها…
أما لو جمعنا هلجلمتين: “إنته” و”خاب” فكلكم تعرفوها (طبعا بعد رفع حرف الهاء الزائدة من كلمة إنته)…
إللي وازاني أحجي…. أقصد أكتب… هوه بعض تصريحات البعض واللي يكول بتصريحه أنو المنصب الفلاني هوه من حصة المكون مالتنا وأحنه نحدد الشخص اللي يستلمه بيناتنه (يعني بين كتلهم).
وأكيد وحتما ولابد راح يطلع لنا واحد ثاني وثالث ورابع بتصريحات من هلقبيل…
وبعدين كلهم يكولون إحنه متمسكين بالدستور وبالشرعية!!!!
شنو هلحجي؟!!! أشو شي ما يشبه شي
يمعودين ماكو واحد ابن حلال يفهمّهم أو يباصرهم ويكوللهم شنو مرامكم بالضبط؟!!!
لكن يا جماعة يظهر إنو دستورنا مخلط يا لوز يعني:
دستور مرن وغير مرن (جامد)…
مدون وغير مدون (عرفي)…
مؤقت ودائم (والدوام لله وحده)…
قصر بجمع، دستورنا حاوي كلشي وكلاشي والجماعة حسب الرغبة مرة يريدونها محاصصة عرفية فيتمسكون بالعرف ويلبسون الدستور…
ومرة يردونها شرعية (!!!) ويعرّتون بالدستور… وإلخ إلخ
فدورات يتمسكون حيييل بالدستور ودورات حيييل يلبسوه
يعني لاعبين لعب بالدستور المكرود وحاطينه راس حاجة وحسب الطلب…
بيني مابين الله تره مثل هيجي دستور يستاهل وحيل وابو زايد بيه وحيل باللي راضي بيه وحيل بالساكت عليه وهوّه ماكل (حشاكم) تبن من وراه …
مخلص الحجي “أحاجيج يا بنتي وأسمعج يا جنتي”
هذي أول مرة أتوازه وأكتب بالجلفي
عذرا للجميع من بعض المفردات، باكت دورات الواحد يطلع من هدومه.
ملاحظة: باكت (تعني لكن) في بعض لهجات أهلنا البغادة
مع الاحترام والتقدير للجميع