– سوساتي حبيبتي، وينچ سوسو حياتي ؟
– مخ البشه صارت سوساتي حياتي مائده خاتون ؟ والله من تصير عندچ شغله يم أحد أم قتيبه ؟
– سوووووساتي ؟
– ها باجي، إجيتچ، بس دا الم الهدوم من السطح.
– يلا منتظرتچ بالحديقه، خلي نشربلنه عصير برتقال ونسولف شويه، كولش مشتاقتلچ..
– مشتاقتلي ؟! يمه يمه..
– اشو تدردمين سوساتي ؟
– لا باجي دا اگول هذا عصير فريش، لو من هذا أبو خمسه بربع ؟
– فريش وحياتچ، وعاصرته بيدي
– الستار الله اليوم !
– أگولچ حبيبتي، عندي سالفه وأريد آخذ رأيچ بيها.
– تفضلي باجي !
– أريد أسوي شويه ( إصلاحات ) بادارة البيت، أريدكم تعاونوني شويه، واريد آخذ رأيكم بكل شغله نسويها! شنو رأيچ ؟
– شعجب باجي، مو هاي صلاحياتچ چنتي تگولين، وما تسمحين احد يتدخل بيها، شنو اللي تغير ؟
– ما تغير شي، بس اني طبيعتي هيچ غير مستبده.
– غير مستبده ؟ باجيييي ؟
– شبيچ لچ عوبه !
– ها رجعنه، سوساتي ؟؟
– لا سوساتي، تدرين اني احبچ، ولح نسوي اجتماع عائلي وابلغكم بالاصلاحات الجديدة لادارة بيتنا السعيد الهادئ !
– لويش هالاجتماعات، عندچ اصلاحات سويها !
– لچ انتي لويش واگفتلي سچينة خاصره، هي مخ البشه، أم دشاديش الكودري !
– ها ، اشتغلت العارات، رجعتي لطبيعتچ الاستبداديه ؟
– لتگولين إستبداديه، لا أسجنج بالمرافق، وأگطع عنچ المصرف، وأسولف لساطع رجلچ الاثول كل سوالفچ !
– هو انت شعندچ غير التهديدات، كلما حچينه وگلتي أفضحكم !
– هسه شگلتي ؟
– گلت : لا اله الا الله !
– صايرتلي هند رستم : دماغسز !
– أوووو
في أمان الله