اكثر مايقلقنا في العملية السياسية هو تصرفات خدام الشعب وممثليه في الحكومة العراقية والبرلمان، فامس قالوا اشردوا اجاكم السفياني! وبعدين كَالوا اجاكم الجيش الحر والدهن الدوني، وقبله بيوم كَالوا راح ياخذون سلاحكم ويصلخون جلودكم، وذيج الصفحة هم مشعولين الصفحة قالقين اهله، اجاكم الذيب اجاكم الواوي اجاكم جيش المهدي، اجتكم قوات بدر، والقوات المجوسية، وهمه تره هم عدهم خراعة خضرة الشيعي استاني السفياني ، أسمها سني ستاني سليماني، وكل هذا قبل كل إنتخابات! شفتوا بعماركم هيج طايح حظهم، ولكم العالم قبل الإنتخابات تقدم برامج وتخدم العالم وتدور على مشاكلهم حتى توعدهم بحلها من خلال التشريعات، وانتوا حايرين بالدجل، وآخرها جفتتهم للبارات والعركَجية، ولكم شجابكم على بغداد شطببكم للملاهي، ليش يابه هيه غريبة عليكم موجنتو أربعين سنه غركَانين بيه بأوووووربا ، والعراقي ماعنده غير النظر بوجه القائد من خلال تلفزيون العراق وتلفزيون الشباب، ولو هسه كلهه مثل عدي وصدام كلمن عنده تلفزيون واربع وعشرين ساعة يصفط علينه حجي ، وقال عمر وقال علي ، وقال الإسلام ، وهو لا يعرف من الإسلام غير العمامة السودة والعمامة البيضة, وأحسن من عدهم ابو شماغ أحمر الملفوف طرزاني اللي صادق الإخواني يومين وبدل لمن شاف الحجي الإيراني! طبعا ً آني مو علماني ولاسفياني ولاسليماني ،بس جانت عندي بهاي الدربونه ثوابت جنت أعتقد إنها ثوابت، وضحكت كثيرا ً قبل خمس سنوات على رأي الزاملي في أحد مقالاته لمن نزل دوسه ونص عليهم وعلى ماسماه خزعبلاتهم ، وفي نفس اليوم اجاني اياد بالحلم ورفض الجلوس معي لكنه ضحك كثيرا ً وبثقة كَال تضحك عليه اليوم بس راح تشوف بعينك حقيقة دجلهم وخرافتهم، فقلت وقتها اعوذ منك ياشيطان ، ولكن لمن وصلت يمهم كلش عرفت أن الله حق وقطعت عهدا ً ـ اذا اجه المهدي (عج) سأكون اول واحد وياه وأمسك سيف ابو الثلج واحز بي رقاب كل رموز الدجل والنفاق اللي قابلتهم وعرفت شنو طينتهم الخايسه ، ولكم والله أهل العركَ أشرف وأنبل وأكثر نفعا ً منكم للبلد، على الأقل من تنخاهم يجوك ركض مهما كانت المخاطر، وعلى الأقل معظمهم مو حرامية ولاجليلي الحيا ، ولم يتسببوا بأي ضرر لبلدهم .
ونريد نسولف وياكم شوية عن الديمقراطية والحرية اللي جبتوهه انه على ظهور الشكَر ، وعلى أساس احنه زمايل وهوش صدام ومانعرف الحرية والديمقراطية ،لا والنوب تشتغلون تحت راية مكتوب عليها شعار دولة القانون، والحقيقه اليوم هي دولة الفانون!
انكَول انتوا ناس منتخبين من قبل الشعب عن طريق كَواني الديمقراطية ، يعني الحرية التي أتت بها الديمقراطية ، وليست الحرية التي ينادي بها الإسلام ، ولم تأتوا لا وفق نظام الشورى ولاوفق نظام ولاية الفقيه ولا وفق نظام الحكومة للأصلح وليس للأصلع على كَول طيب الذكر داوود الفرحان
لعد شلون تصولون على العركَجية من غير تشريع قانون يمنع احتساء الخمر، وقتل المطيرجية، والحب على شواطئ دجلة والفرات! ألا يكون هذا مخالف للقانون ؟.
بعدين شنو البرلمان شرع كل القوانين واليوم مستعجل على العركَجية، شنوا شفتوا العراقيين فقره ومكَاريد وتريدون تعبرون عليهم مالاتكم، موهاي دولة ايران الاسلامية التي تعمل تحت امرة نظام ولاية الفقيه ليش هيه مابيهه عركَ ومرك َ وليش انتوا ماتندلون كل هاي الزواغير، و اذا ما تندلون نتصل بصديق اسمه وهاب يدليكم عليهه .
لو كنا نعلم أن هذا الفعل هو لمصلحة العباد ولله في لله سنرتب عليكم شغلات أنتم في غنى عنها، وسنقول لكم هل يوجد في شرع الإسلام عفوا للقاتل وللسارق وللمزور علما ً أن كل هؤلاء هم من بطانتكم كما تصرحون بذلك يوميا ً ، ويحضرني هنا لقاء قبل أيام معدودة في احدى القنوات الفضائية مع القيادي والنائب في البرلمان العراقي السيد كمال الساعدي، حيث ساله مدير اللقاء عن اجتثاث الفساد والمفسدين ولماذا لايستطيع دولة رئيس دولة الفانون أن يضرب رؤوسه، فرد النائب أن ذلك غير ممكن بسبب سياسة (شيلني وأشيلك) و(غطيلي وأغطيلك) بربكم هل يوجد في الإسلام ضمن تشريعاته هذه المصطلحات !! والله لازلت أقول أهل العركَ أحسن منكم وبعضهم يدخل الجنه حسب قول الشيخ الدكتور احمد الكبيسي ! نعم جاء ذلك خلال محاضرة له في الفلوجة ، عندما سأله أحد المواطنين عن رجل جيرانه أنقذ بيته وعياله من الحرق بالنار التي اشتعلت بعد الساعة الثانية عشر ليلا ً في مسكنه ، وحينها صاح هو وأهل بيته بأعلى أصواتهم طالبين نجدة من الجيران ولم يحرك الجيران ساكنا ً ولكن هذا الرجل السكير وكان لحظتها مخمورا أيضا ً جاء مسرعا ً وبيده صوندة بيته وبعد أن شغل ماطور الكهرباء وأخذ يرش بكل غيرة العراقي على مواضع النار حتى أخمدها ولم يسمح لها بأكل الدار بمافيه ‘ فقال سارد القصة للشيخ الكبيسي هل يدخل هذا الرجل النار وهذه أفعاله بينما يدخل جيراننا الجنه ؟ فقال الكبيسي إذا كانت أفعال هذا الرجل الشهم هكذا أنا أضمن له الجنه وبهاي الركّبة وأشار إلى رقبته !
شوية ياقواتنا الداخلية احترام للمواطن وان كان من محتسي الخمر ، لا تصيرون أسود عليهم ، وأمام الإرهابيين دجاج مصلحة ،
وللبعض نقول  شويه لا ترمون الحجر على جيرانكم وبيوتكم من زجاج ، و لكي يتقبل المجتمع منكم بعض النصائح ، يحتاج لإرساء أخلاقيات حقيقة من قبلكم لكي يتجاوب مع هذه النصائح ، فلنتخيل أن رجلا ً معروفا بعدم نزاهته وأخلاقه غير السوية، ويعتلي المنبر ليقدم للناس النصيحة فماذا ستكون ردة فعل الآخرين المستمعين لهذا إن بقي هناك في المجلس مستمعون، ومواقفكم هذه ترجعنا إلى عهد الخلافة المزيفة التي كانت تمنع كل شئ ممتع لكن قصر الخليفة يعج بالجواري الراقصات والخمر والميسر، وهذا ما تحدثنا عنه معظم كتب التاريخ الثقة .
وآخر دعوانا أن الحمد لله رب العالمين (ربكم ورب المخمورين) فاحترموا خلق الله وان كان حمار أبو عيون ، وقبل أن اختم كل هذا الحجي تذكرت ابو عيون ابو العركَ ، حيث يعمل الآن في ستوته ليبيع الغاز ، وينقل الوجبه الغذائية للبيوت ، وقد وقف يوم على باب أبو لحاف كعادته كل شهر ليسلمه الوجبه الغذائية من دون أن يأخذ أي مبلغ من الشيخ أبو لحاف ، لأنه شيخ وقر كما كان يعتقد أبو عيون ، ولكن في هذا اليوم سمع أصوات عركه تنطلق من دار أبو لحاف بين أبو لحاف وزوجته ، والله لعبت بيه طوبه ، ورزايل واهانات ، ومن ضمن الحجي اللي سمعه ابو عيون هو : موعيب عليك وهاي شيباتك وانت مسؤول والعالم تحلف براسك موعيب تقشمر نسوان محتاجات وتعينهن بالدائرة وتتزوجهن بالسر ، شنوا اقصوري وياك ، وشتكَول لويلادك لو دروا بابوهم الشيخ ، هسه موعرفناك من قصة اللحاف عكره وجلف وتحجي شكلين شكل يمي وشكل على المنبر للناس ، النوب جاي تلعب عليه ، اليوم أكَلب الدنيا عليك ، وهنا طرق أبو عيون باب ابو لحاف بكل قوة ، وخرج الشيخ وكأن شيئا ً لم يكن في البيت ، وقال لأبو عيون: ها وليدي الله يساعدك الله يبارك في رزقك ويكفيك شر بنادم ، فرد ابو عيون بكل عصبية ومن دون إحترام معهود منه على الشيخ ، شوف شيخ، لارزق ولا الله يبارك بيه ولا يجفيني الشر ، اليوم تنطيني 48 ألف دينار كراوي 24 شهر وجبة ، وما اتحرك من الباب اذا ماتجيب الفلوس ، ولا شيخ ولابطيخ، طلعتوا كلكم جذب بجذب ، فدخل أبو لحاف للبيت وكَال للحجية اليوم أبوج أحركَه انوب ورجتي عليه ابو عيون الي راح يفضحني بكل درابين الولاية ، وخسرتيني فلوس كروة الوجبه 24 شهر .
فيا جماعة أبو لحاف ورهطه، شوية  لا تتصورون القضية تبقى خافية على أبو عيون وغيره ، ولا تتحرشون بالإسلام وضوابط الحرية فيه ، وظلوا على الحرية في الديمقراطية المسلفنه أحسن إلكم ولاهل العركَ.
[email protected]