ألف تحشيشة كتلة المواطن!

بينا طبع كلش زين مايتبدل شلون ما تتجمع الواوية علينه ! اذا شفنه واحد بيه رجه او بقايا من رجولة وغيرة، شرط ان تكون عراقية , نظل نهز بهاي النخلة الزهدية حتى ياكل شعبنه تمرهة, و)بافلوف( من شاف الحمامة تعرف تنكََر استغل هاي الصفة البيهه وعلمهه شلون  اتدكَ الجرس الكهربائي , وهواي من الناس ما تقبل تفهم سالفتنه هاذي , ويريدون يكَصون النخلة من العرج مثل من قصوا الجعفري وظلوا يحنون لفي نخلتهم المكَروده , واحنه قابلين بالزهدي مؤقتا ً , وماكوا داعي نتمادى باحلامنا ونطلب البربن من هسه , شنو حبهه ولبط ؟ وعبد الله من جان بالجبهه هو وجماعته كاتلهم الجوع لان تلث تيام ماواصلهم التعيين , وعبد الله بأيام القادسية الأولى تمنه وحلم بفد ماعون باجله بالدهن (ثريد) ورد عليه صاحبه : كَاله :كود فوكَ الباجله فد جم  بيضة طكَ . فانعقج وجه عبد الله وكَال بهستيريا : هسه اله بييييييييييض . نعم هذا ديدننا وغيرتنا على وطنا نقنع بالقليل , بدليل من جان ابو هدلة هو حامل شارة الكابتنية وعلى الرغم من كرهنا اله لكن وكَفنه وكَفة زلم ماخانوا وكت الضيج , وماننسه بيانات ابو هدله اللي تنتخي بينه باسم علي الكرار والحسين الشهيد, وتتذكرون انشودة :
ابو حسين علي ………..  يكرار علي
ياسيف الاسلام ………….سيفك أمانة
وسيف صدام   …………هو النهانة
 وشوفناهم الويل لاجل عيون بلدنا وعرضنه , ومنين ما يهجم العدوا نطلعله مثل الاسود , والله ما اجذب والشهود لساتهم عدلين , بساعة تنفيذ الرمية من العدو؛ جنه نجمّر جمّار !! والقذايف مطر علينه , بس جنه نردد الله ومحمد وعلي والحسين ويانا , وطبعا ً اليوم اهل الدهن والجل وخيط الحفافه والبناطيل الحصر , ما يعرفون شنوا تنفيذ الرمية , ونكَلهم يعني آلاف القذايف تسقط على رؤوسنا في ثواني قليلة ومنطقة صغيرة جدا ً ! ونمشي بطولنه ونخل التنومة يفينه ويشهد صلابتنه , واليوم ايران خابصه العالم كله , واحنه خليناها ترفع الراية البيضاء !
كل هذا لمن جانت الكابتنية بدين ابو هدلة , ولكم اخوتي لحد يقشمركم , شوفونيني أشلون تفاخر بتاريخ العراق حتى لو جان الكابتن مطي مثل ابو هدلة , صحيح اكوا بعض الطليان بذاك الوكت مثل هذا الوكت مايعرفون غير التذلل والتمسيح وتبويس اللحى و جانوا  يسمعون عمهم يردد كلمة الشروكَ وهمه طبعا ً على حس المطي خفن يرجليه ,واليوم الكابتن نوري يونس محمود المالكي  وباجر يجي كابتن غيره ,  وطبعا ً أني شخصيا ً أرشح نشأت أكرم , وما أرشح عدنان حمد حتى لو لبس عمامة  وطلعت الشمس من أمريكا مو من اليابان , لان الحكَ ينكَال حتى لو الامن الوطني نصب سيطرة بباب حوشنه  ,  وعلى كَولة الشاعر المرحوم كاظم الرويعي
(أغنيلج : لو زرعوا طريقي كل شبر خنجر
 وأغنيلج :  لو حركَوا اقلامي وباكَوا الدفتر)
وأحط شوية من عندي بهارات لهذه الابيات , واكَول أغنيلج لو حركَوا لحافي وباكَوا المندر .
, طبعا لو سالتوني ليش ترشح نشات بالذات ؟ موعبالكم جيفن مذكور بمنهاج انكَليزي الثالث متوسط ,ولو جان ترشيحي اله على مود هاي السالفة جان رشحت نجاح علي لان هم مذكور بالمنهاج وهو ملاكم وأقوى من نشأت بالبوكسات , بس نشأت شغلته شغله : أولا ً هو لاعب وسطي , وثانيا ً يوزع الكرات بشكل دقيق ومدروس وكل لاعب يطيه كرة على كَد مؤهلاته , ومايتأثر بصياح جمهور الخصم , وهداف من الطراز الأول وعازف مايستروا ممتع , ومتواضع جدا ً مع الجميع , ويومية يتصل بامه يسأل عنهه , ولوفاز بالرئاسة وقتها نطالب بالبربن والشكـّـر واجود انواع التمور.ليش ؟ لان نعرف بيه مايحتاج للهز .لان عبد الله من رجع للخلفيات من الجبهة وشاف الوضع مستقر وآمن وماكوا قصف والتعيين يوصل يومية ؛ وكَف بعين الآمر بكل شجاعة وكَالهه : ليش الفاصولية معجونهه قليل ؟! واذا تسالوني ليش مارشحت عدنان حمد فاسبابي كثيرة واهم سبب بيهن كرهي للخيانة واصحابها , وخاصة اذا كانت على نمط خيانة سيد علي اللي دزوه اهل منطقتنه حتى يخطب مرة لولد من الويلات وخطبهه لروحه , وصار مثل وعبرة للخيانه (خطبة سيد على الروحه)
ولكي أفهمكم بقصة اليوم أزيد الكم قصة أخرى على الخيانة المبطنه !
جرت مباراة كرة قدم رسمية سنة 1977 في ملعب بابل المحلي بين نادي المسيب ونادي المدحتية , كان الجو ممطرً وباردًا , خسر فريقنا ( فريق المدحتية) اللعبة بنتيجة 1…0  ولمن رحنه لغرفة الملابس اجا واحد مخربط مانعرفه  وكَال تره لاعبهم الكَول عليكم مزور ويلعب لنادي الكوفة, وذهب مسرعا ً, وتم تكليفنا فورا ً مع محاسب النادي ابو العوف ولاعب الدفاع علي عبود ولاعب الوسط حسن نجم ابو الدهين بالذهاب الى نادي الكوفة بذيج الليلة البارده والممطرة ,حتى نعرف الصدكَ من الجذب  وطبعا روحتنه وجيتنه كله على حسابنه ، مو مثل ايفاداتهم  اليوم كله على حسابنه ! , وفعلا ً تم تقديم اعتراض على هذا  اللاعب , وأعتمد الاتحاد الاعتراض وخسروا  فريق المسيب بثلاث أهداف وتبين أن صاحب الوشاية هو من اللاعبين الاحتياط في فريق المسيب , ومن شدة زعله عليهم جيفن مانزل بهاي اللعبه  دكَ هاي الدكَه بيهم, لعد شلوووون ، لو تلعب لو تخرب الملعب , وتروح تصيّح الصايحة عليهم يم اليسوه والمايسوه , ويدخلون بصلب طلايبنه , لعد منين جابوا هذا الحجي من كَالوا المالكي لا يمثل كل الشيعة , زين يابه ومنو كَاللكم المالكي يمثل الشيعة ؟ المالكي يمثل الشيعة والسنة والاكراد والتركمان والشبك واليهود والاثوريين والكلدان  والمسيح، ويمثل كل مكَلكَل وخوش آدمي بهاي الولاية غصبن على اليرضه والمايرضه, ليش لأن البرلمان اللي يمثل كل ذولة الناس حسب الدستور هو اللي خله المالكي كابتن عليهم ومو الكابتن اردوكان ولا طهران ولا أمريكا ولا كربلاء ولا النجف.
 والله عيب هسه لا أحد دزّك لا كَالك شتسوي جاي اتدور مالات لاعب المسيب الاحتياط , وسوالف سيد علي اللي خطب الروحه مره , لا والمشكلة مايعرفون مزاجية الشعب العراقي , شكَد نحب علي والحسين والرسول واصحابه الحبابين , بس  نتخبل ويجن جنونه من واحد يشتغل باسمهم وهو كَاعد بالاحتياط يتصيد بالماي الخابط , ويفتن على ربعه , مو اخوك المالكي خوش لطم بن ياسمين على حلكَة ليش تنغص الفرحة علينه , وانتم مو تكولون (الخلاف لايفسد للود قضية)! ولو نرجع للتاريخ  جان شفنه علي هو وأبناءه الحسن والحسين شلون وكَفوا وكَفه مال أخو لأخيه لعثمان لمن حاصروه  الثوار اللي انتفضوا بعد ما دب الفساد في مفاصل دولته على الرغم من انه كان رجل خير وصاحب دين وورع وشريف , لكن كَرايبة وعشيرته استغلوا هذه الصله وانتشروا بمؤسسات الدولة مثل الارضه وخربوا كلشي وكلاشي, ونشروا الفساد والرذيلة , ولمن كَبت عليه ظلوا يتفرجون وما مدوله ايد المساعدة , ولمن استشهد استخدمو قضيته  لاغراضهم الدنيئة, وقضية قميص عثمان مشهورة , وقتها قال علي لقد خذلوه لمن جان منتصر ونصروه عندما خسر , ومثل مادا يسوي اليوم اعداء العملية السياسية وربع الكابتن نوري اللي همه رجل سودة ورجل بيضة , واذا مايعالج الامور يمكن تكَب عليه مثل ما كَبت على عثمان.
آخ ولو ماشويه عيب وفشله جان اليوم كَبت عدي وطلعت كل السوالف في رحلتي البطوطية الماحجيت عنه يوم  , وكلهه سوالف ماينلبس عليه لاغترة ولاشماغ ولاجراوية ,  وأزغر وحدة بيهن (الامام الحجة يشتغل بالآجل)!!
 ولأن عبد الله من تسرح كف ردانة وطلع للشارع ويريد يلكَالة واحد مخربط حتى يضرطه.
[email protected]