مرتين رحنه للانتخابات..ومرتين فشلنه في أيجاد من يمثلنه..بالمره الاولى أنتخبنه اللي كصصهم مختومه بجعب حذاء 43 أسود بدون قيطان..وبشده فوك الراس بيضه وسوده وبأحجام مختلفه وتبول وهيه واكفه.. وجان شعارهم .. نمشي للديمقراطيه ونبني الوطن.. يا وطن أيقصدون صدكوني ما أدري .. وجتي فتوى السيد أبو طياره.. أنتخبو بدون قيطان لانهم أمل الوطن .. رحنه مثل الزمايل وطمسنه أصبعنه وين ..وين طبعا بالازرك ..خلوكم وياي وكلنه يا معين..وحياتكم من أول أسبوع شدو علينه شده بس الرب في العلى هو الشاهد على ما فعلوه بنه.. وبدى السلت ..هايه ألك وهاي ألي ..شيعي سني كردي ..يا هو أليجي من هذا المثلث وجيب خمط وبعد ما تسمع صوته.. يمعودين خلونه نبني الوطن..أثاري الجماعه بنو جيوبهم وبيوتهم أولا..الجوع كتلنه..الوادم كامت وين أكو كاع فارغه تبني عليها عشه غرفتين ومطبخ حتى تستر عوراتها..وين متصير خليها أتصير..وجتي ويه هاي الشله مصطلحات لا عالبال ولا عالخاطر ..وبدت عدنه خلايا معلكه وطرح ..هذا أيكول فجر أخوك برمانه سعرها ثلاثميه وهذا أيكول أحرك عزيز أخوك برصاصه كاتم سعرها ربع ..صار عدنه مزار للقتل ومرتزقه تسمي نفسها بالمجاهدين..وجيب ثرم.. تلكي الراس بجفه واللشه بجفه..وكعنه بين عمر وعلي..وأشتغل الخطف وجيب فديه.. ناس أكلت خره بأثنين أيدها لان متعرف أكل الحرام وظلت عايشه عالراتب.. وناس من الفكر صارت وشبعت من الحرام..كل هاي وحكومتنه الرشيده أتباوع وما تتدخل بكلشي لان حايره شلون تلغف..
حلفنه وكلنه هاي هيه بعد لو مو السيد أبو عمامه يجي هسه لو يجي الخزعلي بزره بعد يا أنتخابات أحنه وياج صرنه كوم.. لافونه بدربونه جديده.. ذوله المرتزقه أيعرفون شلون يشتغلون على هيجي شعب طايح حظه وميفكر..الدربونه الجديده..أذا ما تنتخبون تره السنه حادين سنونهم عالشيعه..وأذا صارو بالسلطه تره حارث الضاري وزلمه, ورغد صدام أيذبحوكم ويشمرون لحمكم للجلاب.. وأنتخينه.. وكلنه أنا غلام أبوي..أحنه أنخلي ذوله النواصب أيصيرون بالسلطه.. يا كاع أخذيني وطميني .. ومن غبشه الله وكفنه سره أباب مراكز الاقتراع.. مو الله سبحانه مطانه عقل بيه خير ..وفازت الشيعه..وطشينه واهليه وشربت وزعنه بالشوارع..وصار الحكم بيدينه.. هسه نجي حتى أنطبق شعارات أهل البيت عليهم السلام بالعداله الاجتماعيه وأظهار الحق.. وبعدين نبني وطنه بالتساوي.. دخيلك ربي .. الجماعه من أولها حادين سنونهم.. يمعودين .. وهيه أشتغلت مربعتين..لا بقت طاولات مستديره ما أنهبت ولا مقاولات كبل توقيع العقد ما أخذو فلوسه وشلعو ..وأشتغلو حلب للنفط أيشي شيعه فضيله وأيشي شيعه المجلس الاعلى وأيشي شيعه حزب الدعوه وأيشي الاكراد..ومافيات ألحد كتابه هاي السطور أكو مافيات تشحن بالشاحنات وبدون عدادات..وفرغو بأيران وتركيه والاردن وشركات أمريكيه تبلع ودكول هل من مزيد.. على تفريغ العمله الصعبه من البنوك حتى أيكعدون العراقي مو عالبطل لا ويكعدوه براس كل شارع حتى أيصير مجدي أيبيع جكاير وعلوجه مثل كبل.. بيع وشرى للمناصب الوزاريه والوكلاء وصارت مكاتب دلاليه تلكيها بالكراده والجادريه وتسكن عمارات فارهه بعمان وبيروت تستلم فلوس هاي المناصب..شكد تدفع وتصير نائب.. وحتى المجالس المحليه والمحافظين.. لان ذوله حاسبيها ..أربع سنين السيد الوزير لو النائب لو المحافظ يخمط راتب زائد عمولات زائد حوافز ..فيطلعون السعر الرسمي لكل واحد من ذوله الصخول شكد يسوى ..جاه وين العداله وين التكنوقراط ..ولكم يا قراط يا طركاعه.. البلد كله صار ينباع ويشترى .. يمعودين تره حزب الدعوه مو هيجي .. هذا حزب ناضل وقدم تضحيات..أثاري الجماعه أيريدون أيطلعون المظلوميه مالتهم.. يمعودين هذا الشعب العراقي .. خطيه تره دمرتوه ..لعد وين حجيكم من جنتو مرشحين .. أنا أبن العراق البار.. أولا محافظتي ثم العراق .. معا لعراق جديد واحد موحد ..أثاري أحنه مشفنه الجماعه شنو جانو أيقصدون من بوستراتهم اللي هيه نفسها اليوم تارسه شوارع العراق بمئات الملايين من الدولارات طبعوها بأيران ..جانو أيقصدون أولا جيبي وبعدين أهلي وطزين بالشعب.. الشعب اللي ركص لصدام حسين ميستحق العيش ولا بناء مدرسه ولا حتى مستوصف..أنا أخوك أنغدرنه.. وغدر الغادرون ..أربع سنوات ذوله باقين .. موت يا زمال لمن يجيك الربيع .. والتالي شلون ..منو أيخلصنه من هاي الورطه..دخيلك ربي..أنكوم من وجعه ونوكع بوجعه..وشلون وجعه..غسل ولبس..لا نفطات بقن ولا فلوس خلو..من طركاعه عليكم وعلى اللي جابكم..هاي وين جانت للعراقيين..
وكتبنه للسيد أوباما لان هو الراعي الرسمي للعراقيين.. بأعتبار العراق بعده بالبند السابع .. كال هاي مو شغلتي ..التدخل بشؤون الدول الاخرى تجاوز..حلو مشاكلكم بيناتكم .. جاه من طبيت علينه مو تدخل .. بس من سويتو العراق هوسه .. لا أني معليه..صدك من وصلت ألحد أبن عمها كالت عيب..
ومن أجل ذلك..ما أريد أنتخب هاي المره..هسه لو يجي البابا ويكول ألخاطري بعد التوبه وراح أنشر هاي الدعوه لكل أهلي وعشيرتي..لان الجماعه مرتبين كلشي..غمستو أصابعكم ما غمستوها يك حساب..لعد وين أغمس أصبعي..
وما خفي كان أعظم
