الشغلة يرادلها صفنة طويلة و استرجاع الذكريات والمواقف , حتى أكدر أخذ القرار الي يرضي ضميري ويحقق الخير الية ولأهلي ولناسي ولكل العراقيين , لازم آخذ قرار هاي السنة يرضي الله ورسوله والدين والشريعة والمذهب , لازم يكون صوتي للانتخابات أمانة أحاسب عليهة أمام الله والتأريخ , أي نعم التأريخ , الناس الي راحوا خطيتهم بركابنة ليوم الدين , اي نعم احنة انتخبنة البرلمان الحالي والحكومة الحالية , الي فشلوا شر فشل في حفظ الدماء والأموال والاعراض , هسة لازم أفكر زين وأنطي صوتي للزين والي أيدة نظيفة , أولاً خلي اسوي استثناءات بصورة عامة وما يناقش عليهة ضميري , كل من رشح قبل سنة لأنتخابات مجالس المحافظات وما فاز لازم ما انتخبة لأن هذا الناس ما انطتة ثقة بذيج هسة مراح تنطيه الثقة اكيد , أما الي فاز ورشح مرة الخ هذا فد واحد انتهازي وموخوش أدمي , يعني استغلالي لدرجة ان يستغفل الناس يا اخي ويا اختي الاولى انو انت تروح تطبق وعودك الي الناس انتخبتك علمودهة بمحافظتك وعود من تنجح بالمحافظة راح احنة ندعمك ترشح بالانتخابات النيابية الدورة اللاحقة , وعيب عليكم الي دا اتسووه , أما النواب الحاليين والسابقين بأذن الله , فما ممكن انتخب واحد منهم نهائياً لأن كلشي واضح المهزلة الي أحنة بيهة خير دليل واثبات على فشلهم , يا اخوان والله ما سووا شي غير ناس بس شعارات وناس بس لغف وناس بس نايمة وناس بس غيابات وناس سفرات للخارج وولد الخايبات يتذبحون يومية , أما الكتل الحالية فكلهة تتحمل مسؤولية الفشل بدون استثناء بدءاً من دولة القانون وانتهاءاً بمقاعد الكوتا للمسيحين والديانات الأخرى , و لا يمكن تحميل مسؤولية الدماء الي سالت بركبة دولة القانون , لازم نتذكر الكتل الي تسوي نفسهة بالجذب معارضة وهي بالفعل مشاركة بالحكومة فكل كتلة عدهة اربع الى خمس وزارات ونواب رؤساء ووكلاء بالوزرات ومدراء عامين وقادة فرق والوية وافواج ومديريات وكلشي وكلاشي , والبوك متوزع بكل الجيوب والشعارات جاهزة وحاضرة ,
يا اخوان والله الشغلة اتدوخ بس اني لازم انتخب شخص جديد بكتلة جديدة زين ولازم متعبر علية شغلة دخول الكتل القديمة بقوائم انتخابية جديدة وباسماء جديدة لان اني اعرف منو الابن ومنو الابو عمي ترة صارلنة دعش سنة افتهمنة السياسة أحسن من مؤسس علم السياسة العامة , ونعرف شنو سانت ليغو وشنو يعني الكتل الصغيرة تربح احسن من الكبيرة ونعرف شوكت يرجع الفرع للأصل , أحنة نعرف كلشي ,
بالاخير راح انتخب ناس شرفاء ومشروعهم مدني وعلمي , ناس نعرف عنهم كلشي صريحين و اياديهم بيضة , من عدنة وبينة , نكدر نأثر عليهم شوكت منريد , ناس يعتبرون ساحة التحرير برلمانهم الحقيقي , نعم ساحة التحرير , همة جماعة التحالف المدني الديمقراطي العراقي , والله يستاهلون خل نجربهم هالاربعة سنوات , ونحاسبهم اذا قصروا مثل مراح نحاسب الخذلونة هسة , أحنة كلشي نعرف.