9 أبريل، 2024 8:16 ص
Search
Close this search box.

ميليشيات ومسلحين يتنزهون في بغداد !!

Facebook
Twitter
LinkedIn

كلنه نعرف أن أمريكا وأسرائيل من صنعت الجماعات المسلحه في أمريكا الجنوبيه.. وفلشت الاتحاد السوفياتي ..وهاي الدولتين من يتحكم بالعالم الجديد ..وهيه من صممت الهيكل العام للقاعده وأشرفت على أختيار قادتها وعناصرها في أفغانستان لضرب جيش الاتحاد السوفياتي ..وبحركه بهلوانيه كلبت عليها..وقادة القاعده وكوادرها همه من العرب حصرا..وهاي بيها غايه أسرائيليه..وكلنه يعرف هاي المؤسسه العسكريه اللي تتكون من خلايا, من المغرب العربي ومصر والعراق والاردن والخليج العربي.. وطبعا هاي الجماعات أدربت في الصحاري والجبال والوديان من قبل أجهزة الاستخبارات الامريكيه وعناصر أسرائيليه مختصه ..هاي الجماعات دخلت ويه قوات المارينز اللي دشت العراق في 2003 ..وأستقرت في مناطق غرب العراق وما زالت..وأسست ألها أرضيه ومعسكرات وخطوط أمداد تعززها أمريكا بالاجهزه والمعدات والخرائط ..وبعض من هاي الجماعات تحارب الان ضد النظام السوري وبشكل واضح..
زمن الدبابه والمدفع ما عاد تستخدمه أمريكا وأسرائيل للحفاظ على المصالح العامه والنظام العالمي الجديد..وطبعا الحروب أتكلف هاي الدولتين البشر والفلوس ومبدأ الخساره والربح ..والحرب على العراق أثبتت خسارة أمريكا ماديا ومعنويا بحسب ما همه أيكولون وروحو شوفو جنودهم بمستشفيات المجانين والمليارات اللي خسرتها.. بس مع هذا ,أكو ناس عدها عقول بمعاهد بحوث أمريكيه وأسرائيليه أشتغلت ليل نهار حتى توصلت الى منتوج جديد لخلق فوضى بالمنطقه العربيه بدون خساره للبشر وأعتماد عنصر الربح في هذا المنتوج دائما..
أكذوبة رياح ربيعيه تهب على الانظمه العربيه وبس الجمهوريه منها, وهاي أول شي..وأستخدمو بيها الانترنيت ووسائل أعلام عربيه وبعض الاقلام العربيه اللي عدها جمهور يثق بيها وبكل كلمه أيكولوها ,حتى أتكون العمليه لهذا المنتوج عربيه وما بيها أدنى شك.. وشفنه شلون سقطت الدكتاتوريات العربيه وحده وحده وبفاصل زمني محدد يعني مو كوتره..وأجتي بعدها الفوضى..اللي الانسان العربي ميعرف شيسوي..دايخ وممصدك ..هاي الكراسي تتكسر بهذا الشكل ..ولان هذا التحول من الدكتاتوريه الى ما أشبه بالحريه بعده غامض وبعدنه منعرف شنو الديمقراطيه..ناس هايجه ..هذا كامش صورة الزعيم الفلاني وهو يضرب بيه بالنعل وهذا اللي أيبول فوك صورة زعيمه وصار الفرهود بفلس..وحطمو كل التماثيل اللي جانت جاثمه على صدورنه ..وطبعا هاي كلها محسوبه ومدروسه .. فجابو كلمه الديمقراطيه عن طريق القنوات الفضائيه والاقلام الصحفيه اللي لعبت دور مهم في أسقاط هاي النظم ..وصارت عدنه الديمقراطيه..
أجه دور المليشيات اللي دربوها حتى تاخذ طريقها..غاية أمريكا أن تبقى هاي الهوسه بالعراق..حتى تكدر تشتغل على راحتها ..واللي أيكول أن أمريكا هدفها النفط  كله أنت غبي ..لان صدام عرض هذا النفط مجانا بس يبقى ريس عالعراق ومقبلت ..وبعدين هيه مسيطره على النفط العالمي وبيدها أصعده وبيدها أتسوي الازمات.. فشيلو هاي الفكره من راسكم ..بعدين بثت الطائفيه..وطبعا أكو حيوانات جاهزه وهم أكو حيوانات للذبح حتى تنتشر بين العراقيين ظاهرة أنت شيعي وأني سني..وأكو زلم عدها شوارب وتصلي وذوله جابتهم أمريكا ودربتهم أسرائيل شلون أينفخون بنار الفتنه حتى تشعل الاخضر واليابس..وأكو دول وتجار وقنوات وصحفيين أيحطون حطب ويجهزون النار بس اليد اللي تشعل عراقيه.. وكلنه عشنه هاي الفتره المظلمه واللي بيها خسرنه أرواحنه ودمرنه بلدنه..وشوفو كلشي بالتدريج وحسب الخطه اللي وضعتها هاي الاجهزه البحثيه..هسه كاعد تنتشر ظاهرة الاغتيالات بالكواتم أو بغيرها..المليشيات اللي محد أيشوفها مثل الشبح اللي أيطوف شوارع بغداد وبس ومحد يعرف توقيتاتها بأقتناص الفريسه, هيه هاي اللي نشرتها أمريكا واللي أحنه نطلق عليها الجماعات المسلحه..ذوله عراقيين ميه بالميه.. وعدهم الدولار الغايه والوسيله ويذبحون أبوهم ولا كأنما أيعرفوه..وذوله يختلفون عن ميلشيات تابعه لحزب الدعوه ,وزارة الداخليه, وهادي العامري, والخزعلي ,وجلال الصغير, وميلشيات الحزب الاسلامي..واللي دشت بوزارة العدل هيه خليه من المسلحين وخلي أنسميهم خلية الاربعه, اللي أمريكا تنطيهم السيارات والاسلحه والفلوس والحمايه..ومرات تكمشهم الحكومه ويطبون السجن..وبعد فتره أمريكا أتسوي شغله بالسجن وتنطي للضباط والقضاة جم دفتر ..حتى ذوله العناصر تكدر تهرب.. وتشوف أباب السجن أكو سيارات حكوميه تنتظر ذوله المسلحين وطبعا باجات وأسلحه جاهزه وتخليهم بمناطق أمنه حتى أيرجعون وكت الحاجه..وأكو مرتين صارت طيارات مروحيه تنتظرهم..يعني عمليه واضحه ومدروسه..
وكلنه هم يعرف أكو جماعات مسلحه ومليشيات تتنزه في مناطق متفرقه من بغداد حاليا, وتجوب الغزاليه والدوره والجامعه وحي العدل وطريق قناة الجيش والتاجي..وذوله بعلم حكومة الباشا نوري المالكي وأمريكا..وكل عصابه تشتغل بمعزل عن الاخرى وغير خاضعه للتفتيش والوقوف في السيطرات الحكوميه لانها تحمل باجات أعدت لهذا الغرض..وهسه وكت هاي العصابات اللي تغتال الكوادر العلميه والطبيه..وأكو مهمتها قتل ضباط الجيش العراقي السابق..وأكو عصابات همها
  شلون تخلق الفتنه وتحاول أن تهجر العوائل من بيوتها..وأكو عصابات تغتال الاقلام الصحفيه الوطنيه والحره ..وللعلم كل هاي العصابات تشتغل صباحا وظهرا.. ومتخاف من شي..ومثل ما كلنه ذوله الجماعات تحميهم الحكومه وأمريكا وأيران..
وما خفي كان أعظم

مقالات اخري للكاتب

أخر الاخبار

كتابات الثقافية

عطر الكتب