27 مارس، 2023 11:06 م

حامد لزگة

حامد ابو الليل اخو تحسين عطال بطال يوم يشتغل و عشرة گاعد و مو بس لأن ماكو شغل هو يريدها من الله ماكو شغل حتى يظل بالبيت مرتاح و نايم و ما يكش الذبان من وجهه عجوزي اگشر و يحب ياخذ فضل من العالم و يريد زوجته تصرف عليه مو هو يصرف عليها.

صار يعتمد على اخوه بالفلوس و كل ما يحتاج يروحله و ياخذ منه و تحسين مو كريم بس شيسوي مجبور و بس يريد يخلص منه و يسكته بس زادت طلبات حامد يوميه يريد شي و گامت تزداد الفلوس الي ياخذها و بدل الالف گام ياخذ خمسة و بدل العشرين ياخذ خمسين.

جاب زوجته و جهاله و يعيش ببيت تحسين يگول اخويه عنده قصر ماشاء الله خلي اخذلي غرفة بي و حتى ما يظل عايش وحده خطية يمل و يضوج و يحتاج واحد يونسه و يلتهي وياه بالليل و برمضان لازم العائلة ملتمة و الفطور يصير اطيب من تشوف الجهال يذبون التمن بالگاع و تتورط الخدامة.

تحسين ابو الليل (الدكتور تحسين الفلاني) فكر بخطة تخلي اخوه يرجع لبيته بس شلون ؟ لازم يعتمد على كل الافلام الهندية و الامريكية حتى يسوي خطة زينة ما بيها فيل و لا همبلة حتى يصدگوها و تجيب نتيجة ويه اخوه و زوجته الجكمة.

يسوي عركة بيناتهم لحد ما تزعل المرة و تروح لبيت اهلها و تاخذ الجهال وياها بس حامد شلون ؟ رح يستحلاها الگعدة و يبقى و عود فد شهرين يفكر يراضي زوجته و هم رح يجيبها لبيت تحسين يعني ما يستفاد شي من هالخطة.

ماكو حل غير يخوفهم و يذكرهم بالاستهدافات السياسية و بأي لحظة تطگ عبوة لو سيارة مفخخة لو انتحاري يقتحم المكان و يطشر لحمهم و عظامهم و ما يبقى شي منهم يندفن و تظل بس القطعة السودة و البيضة و القنوات الاخبارية تذكرهم كأرقام لأعداد القتلى.

اتفق ويه حمايته يمثلون دور ارهابيين و يقتحمون بيته و يرمون طلق و قنابل صوتية و جماعة ثانية ترد عليهم و تقاومهم علساس الحماية و بعدين يفلتون و تنتهي التمثيلية و تصير حجة يطلب بيها من اخوه يطلع هو و زوجته و جهاله لأن الوضعية خطرة.

نفذو الاتفاق من الصبح و تحسين عباله حامد نايم بغرفته هو و عائلته و بده الرمي و تكسرت غراض و اثاث تفلش و طلع خبر عاجل و الناس كلها عرفت بس الرمي ما وگف ! و فجأة الجيش تدخل بالسالفة و رح يخربون كل شي و يديحون الحماية.

وگف الرمي و تحسين شرح السالفة للضابط و اقتنع لأن النائب ما يعرف الغلط و راحو و ظل بنص الخرابة و تحسين ما يدري وين اخوه! دور عليه ما لگاه بالبيت بس زوجته و جهاله و سألها وين حامد؟ گالت حامد طالع من الصبح يأجرلنا بيت جديد و چبير و رح نشيل بعد اسبوع!!!!!!

و ضاع البيت و السبب الدكتور تحسين الفلاني (تحسين ابو الليل) بالليل سوه روحه نايم من اجه حامد يگله سالفة الايجار لأن عباله يريد منه فلوس

مقالات اخري للكاتب

أخر الاخبار

كتابات الثقافية

عطر الكتب